Ана мен балаға пана болған орталық

Қазақстанда тұрмыстық-зорлық зомбылыққа қарсы заң шыққалы зәбір көрген жандардың саны азайып келеді. Тіпті еліміздің отбасылық жанжал мен қылмыстың алдын алу тәжірибесін үлгі ретінде қарастырып жатқан мемлекеттер бар. Шетелдік сарапшылар әсіресе Қазақстандағы дағдарыс орталықтарының жұмыс жүйесіне қызығушылық танытып отыр. Еліміздегі мекемелердің ерекшелігі мен артықшылығы неде? 

Гүлсая Сафиуллинаның жолдасымен жұбы жараспай ажырасқанына бір жыл болған. Алайда бұрынғы күйеуінен күні бүгінге дейін қысым көріп келеді. Жұдырығы жуан жігіттің қатігездігі сонша, бес балалы ананы баспанасынан қуып шыққан. Шақшадай басы шарадай болып, шарасыз қалған әйел содан бері дағдарыс орталығын паналауға мәжбүр.

Гүлсая Сафиуллина, жәбірленуші:
- Ажырасқалы ол маған жұмыс істемек түгілі тыныш өмір сүруге мүмкіндік бермеді. Осы орталыққа орналасқан алғашқы үш айда жаным тыныштық тапқандай болды. Алайда ол менің қайда екенімді біліп алды. Мұнда қанша қауіпсіз болса да қорқыныш басым. Қай жерден, қашан кіріп қалар екен деген ойда отырамын. Соңғы рет қолын шошайтып, сені тірі қалдырмаймын деген сөздері әлі есімде. Ұмыта алар емеспін.

Шаңырағы шайқалып, осында тап болғандардың бірі - Анастасия Андреева. Тәні сауыққанымен, жан жарасы жазылмады. Заңгерлердің қолдауына мұқтаж. Мұндағы мамандардың көмегімен бұрынғы күйеуі екеуінің мүлігін тең бөлу туралы сот шешімі шыққан. Алайда ана көңілі әлі де алаң...

Анастасия Андреева, жәбірленуші:

- Кенже ұлымыз үш жаста. Баламды күшпен тартып алғалы міне, жеті айға жуықтады. Сот арқылы ұлымды талай мәрте қайтаруға тырыстық. Алайда ол кассациялық сотқа қайта-қайта шағымданып, істі созбалаңға салып жатыр.

Кейіпкерлеріміз секілді тұрмыстық зорлық-зомбылыққа тап болып, барар жер, басар тауы болмаған қыз-келіншектердің басым бөлігі ауыр күйзеліске шалдыққан. Ошақ қасындағы оқиғаларды туыстарымен бөлісуге тартынғандардың сырласы да, мұңдасы да осындағы мамандар. Дағдарыс орталығында әлеуметтік-психологиялық көмектен бөлек, балалардың қауіпсіздігі де қамтамасыз етілген.

Анна Рыль, дағдарыс орталығының жетекшісі:
- Қалпына келтіру мен қызмет көрсету жағынан дәл осындай орталықтар Орталық Азия елдерінде жоқ. Тіпті Ресейдегі мекемелердің өзі мұндай деңгейге жетпеген. Артықшылығымыз – бізде қызмет түрі көп. Психологтар, заңгерлер. Таңғы астан бастап, кешкі асқа дейін қамтамасыз етілген. Тіпті көрші елден келген мамандар қызметтерімізге қарап қызығып жатады. Сондай-ақ бізде отбасын қолдау орталықтары бар.

Қазіргі таңда елде 60-тан астам ресми дағдарыс орталығы жұмыс істейді. Мекемелер тек уақытқа тұрақтайтын орын емес, нәзік жандыларға жаңа өмір бастауға мүмкіндік береді. Мәселен, биылдың өзінде дағдарыс орталығы үш мыңға жуық жанға демеу берген.