АҚШ акушер гинекологтары дәрігерлерді доулалармен ынтымақтасуға шақырды Қазақстандағы жағдай қандай

Америкалық акушерлер мен гинекологтар коллегиясының (ACOG) комитеті дәрігерлер мен доулалардың - әйелдерге жүктілік, босану кезінде және одан кейін демеу болатын мамандардың өзара іс-қимылы туралы мәлімдеме жасады. Олардың дәрігерлермен ынтымақтастығы алғаш рет жеке ресми құжат деңгейінде егжей-тегжейлі жазылып отыр.

Доула деген кім, Қазақстанда әйел адам оны босануға өзімен бірге ертіп бара ала ма және бұл бізде қалай реттеледі? Осы сұрақтарға Tengri Health тілшісі жауап іздеп көрді.

Доула деген кім және ол не істейді?

Америкалық акушерлер мен гинекологтар коллегиясының мәліметінше, доула - бұл әйелге жүктілік, босану және босанғаннан кейінгі кезеңде эмоционалдық, физикалық және ақпараттық қолдау көрсететін арнайы дайындықтан өткен маман.

Ол дәрігердің орнын баспайды және медициналық шешімдер қабылдамайды, бірақ әйелге күш түскенде көмектесіп, болып жатқан жағдайды жақсырақ түсінуге және медициналық ұжыммен байланыс орнатуға жәрдемдеседі. Америкалық сарапшылардың пікірінше, мұндай қолдау босанушы әйелдерге оң әсер етуі мүмкін.

"Сондай-ақ доулалар пациенттерге ақпарат пен пайдалы ресурстар ұсынады, соның ішінде босануға дайындықты үйретеді, жүктілік кезіндегі өзгерістер мен босанудың әртүрлі кезеңдерін жақсы түсінуі үшін жалпы анатомия мен физиология туралы айтып береді", - делінген Америкалық акушерлер мен гинекологтар коллегиясының мәлімдемесінде.

Коллегия мамандары атап өткендей, олардың басты міндеті - пациенттің мүддесін қорғау. Доула әйелдің медицина мамандарымен қарым-қатынасы кезінде оның үнінің естілуіне көмектеседі:

"Атап айтқанда, шешім қабылданғанға дейін жағдайды және мүмкін болатын нұсқаларды жақсырақ түсіну үшін сұрақтарды тұжырымдауға және медициналық араласуларды талқылауға дайындалуға көмектеседі. Бұл пациенттің өзін сенімді сезінуіне мүмкіндік береді".

Доулалар босану барысына қалай әсер ете алады?

Америкалық акушерлер мен гинекологтар коллегиясы доулалардың қолдауы кесарь тілігі мен босану кезіндегі асқынулардың азаюына, емшекпен емізу көрсеткіштерінің жоғарылауына және әйелдердің босану тәжірибесіне көңілі толуына ықпал етуі мүмкін екенін атап өтті.

ACOG-тағылар бұл сайып келгенде денсаулық сақтау жүйесінің шығындарын азайтуға көмектесетінін де қоса кетті.

Қазақстанда доулалардың қызметіне рұқсат берілген бе?

Қазақстанда әзірге босануға көмектесетін мекемелерде доулалардың болуын реттейтін жеке нормативтік-құқықтық база жоқ. Бұл туралы Алматыдағы "Акушерлік, гинекология және перинатология ғылыми орталығы" АҚ басқарма төрағасының орынбасары Әлия Айымбетова мәлімдеді.

"Бұл мәселе бойынша ешқандай ереже жоқ. Елде нормативтік-құқықтық база қалыптаспаған. Шын мәнінде, доулалар босану нәтижесін жақсартады және сирек жағдайларды есептемегенде, өте жақсы көмек береді", - деп есептейді акушер-гинеколог.

Сонымен қатар Айымбетованың сөзінше, перзентханаларда доулалар серіктес ретінде қатыса алады. Оның айтуынша, пациент пен доуланың қарым-қатынасы әдетте перзентханаға түскенге дейін басталады. Әйел босану туралы келісімшарт жасасқан кезде, доуланы серіктес ретінде алғысы келетінін алдын ала ескерте алады.

"Мәселен, Ұлттық акушерлік, гинекология және перинатология орталығында кез келген әйел доуланы серіктес ретінде ертіп келе алады", - деді дәрігер.

Яғни, егер болашақ ана бұл мәселені аурухана әкімшілігімен алдын ала келісіп алса, онда ол босануға доуламен бірге бара алады.

Спикер туралы анықтама: Әлия Айымбетова - акушер-гинеколог дәрігер, медицина ғылымдарының докторы, Алматыдағы "Акушерлік, гинекология және перинатология ғылыми орталығы" АҚ басқарма төрағасының орынбасары.

Акушер-гинекологтарға арналған негізгі ұсыныстар

Америкалық акушерлер мен гинекологтар коллегиясы (ACOG) акушер-гинекологтарға келесідей кеңестер береді. Сарапшылардың пікірінше, олар:

доулалардың қызметімен және олардың жұмысының артықшылықтарымен танысуы керек; мұндай ынтымақтастық пациенттерге және медициналық ұжымға пайда әкелуі үшін доулалармен құрметке негізделген және тиімді байланыс орнатуы қажет; пациенттерге доулалардың атқаратын түрлі рөлдері туралы ақпарат беріп, әйелдерге доула табуға және қолдау алуға көмектесетін жергілікті ресурстарды білуі тиіс; доула қызметтеріне ақы төлеудің және оларды алудың түрлі нұсқалары бар екенін ескеруі керек; доулалармен ынтымақтастыққа және олардың акушерлік пен гинекологиялық көмектегі рөліне арналған зерттеулерді қолдап, оларды бастауы қажет.

Google News арқылы жаңалықтарымызды қадағалаңыз

Жазылу

АҚШ

дәрігер

дәрігерлер

босану