АҚШ баспана іздеушілердің мыңдаған визасының күшін жояды

Трамп әкімшілігі АҚШ-тан пана сұраған тұлғаларға берілген 200 000-ға жуық іскерлік және туристік визаның күшін жоюды жоспарлап отыр, деп хабарлады AP агенттігі. Бұл туралы АҚШ Мемлекеттік департаментінің құжаттарына сілтеме жасаған Associated Press агенттігіне сүйеніп Tengrinews.kz хабарлайды.

Бұл АҚШ тарихындағы визалардың күшін жоюдың ең ірі жаппай жағдайы болмақ және ол сот талқылауларына ұласуы мүмкін.

Мемлекеттік департамент алдағы апталарда 2016-2026 жылдар аралығында берілген және иелері пана сұрап өтініш берген немесе қазіргі уақытта беріп жатқан B1 және B2 деп аталатын визалардың күшін жою туралы хабарлайды деп күтіледі.

"Біз Америка Құрама Штаттарына елде қысқа мерзімді болу мақсатымен келгенін мәлімдеп, кейін тұрақты тұру үшін пана сұрап өтініш берген шетелдіктердің иммиграциялық емес визаларын анықтау және олардың күшін жою үшін Ішкі қауіпсіздік министрлігімен іс-қимылымызды үйлестіріп жатырмыз", - деді Мемлекеттік департаменттің өкілі Томми Пиготт AP агенттігіне.

Ол қанша визаның күші жойылуы мүмкін екенін нақтыламады.

"Процесс үздіксіз жүретіндіктен, күші жойылған құжаттар саны өзгеріп отырады және бұл жұмыс тұрақты негізде жүргізіледі", - деді Пиготт.

Президент Трамп иммиграциялық заңнаманың сақталуын қамтамасыз етуді өзінің екінші президенттік мерзіміндегі негізгі басымдықтардың біріне айналдырды.

Google News арқылы жаңалықтарымызды қадағалаңыз