АҚШ Иран қақтығысы: Еуроодақ энергияға 27 млрд еуро артық төледі

Бұл деректерді Страсбургте Еуропалық комиссия төрағасы Урсула фон дер Ляйен жариялады, деп хабарлайды BILD. https://bild.de/

Еуропарламент, Еуропалық кеңес және Комиссия өкілдері Таяу Шығыстағы дағдарыстың салдарын талқылады. Осы жиында Урсула фон дер Ляйен:

- Қақтығыстың небәрі 60 күні ішінде қазба отын импорттауға жұмсалатын шығын 27 млрд еуродан асты. Бірақ біз бір де бір қосымша энергия ресурсын алған жоқпыз, — деді.

Оның айтуынша, Еуропа қазба отынға тәуелділіктен арылуы тиіс. Оның орнына қолжетімді әрі экологиялық таза энергия көздеріне көшу қажет. Мысал ретінде ол Швецияны атады. Бұл елде электр энергиясының басым бөлігі жаңартылатын көздер мен атом электр станцияларында өндіріледі. Соның нәтижесінде энергия бағасының өсімі өзге елдермен салыстырғанда әлдеқайда төмен болды.

Еуроодақ алдағы уақытта көлік, өнеркәсіп және жылыту салаларында электр энергиясына кезең-кезеңімен көшуге ниетті. Бұл бағытта әрбір мүше мемлекет өз шешімін қабылдайды. Еуропалық комиссия өткен аптада бірқатар ұсыныс енгізді. Олардың қатарында табысы төмен отбасыларға арналған энергетикалық ваучерлер, энергия үнемдейтін өнімдерге қаржылай қолдау және энергия тиімділігін арттыруға бағытталған ақпараттық науқандар бар.

Урсула фон дер Ляйеннің айтуынша, мұндай көмектер нақты мұқтаж азаматтар мен зардап шеккен салаларға бағытталуы керек. Сонымен қатар бұл шаралар газ бен мұнай тұтынуды арттырмауы тиіс.

Осыған дейін Таяу Шығыстағы қақтығыс салдарынан Еуроодақ елдерінде газ бағасы 70% өскенін жаздық.