Еуроодақ Украинаға 220,3 млрд еуро көлемінде көмек көрсетті

АСТАНА, 24 тамыз – Sputnik. Еуропалық одақ пен оған мүше мемлекеттер 2022 жылдан бері Украинаға 220,3 миллиард еуро көлемінде қаржылық, экономикалық, әскери және гуманитарлық көмек көрсетті. Бұл туралы дүйсенбі күні жарияланған ЕО Кеңесінің мәліметтерінде айтылған.

"ЕО және оған мүше мемлекеттер Украинаға қаржылық, экономикалық, әскери және гуманитарлық қолдау көрсетуден көш бастап тұр. Бүгінгі таңда 220,3 миллиард еуро көлемінде көмек көрсетілді", -делінген ЕО Кеңесінің хабарламасында.

Онда көрсетілгендей, жалпы 220,3 миллиард еуроның ішінде:

107 миллиард еуро ЕО бюджетінен бөлінген немесе ЕО кепілдіктерімен қамтамасыз етілген;

77 миллиард еуро әскери көмекке бағытталған;

17 миллиард еуро Еуропалық одақтағы украиналық босқындарды қолдауға жұмсалған;

тағы 15,5 миллиард еуроны мүше мемлекеттердің өздері тікелей бөлген.

Сонымен қатар, Украинаға көрсетілген көмектің 3,8 миллиард еуросы ЕО аумағында бұғатталған Ресей активтерінен түскен кірістер есебінен қаржыландырылған.

Сондай-ақ дүйсенбі күні Еуропалық комиссия Украинаға арналған 90 миллиард еуро көлеміндегі ЕО несиесі аясында әуе және зымыранға қарсы қорғаныс жүйелерін, зымырандарды, оқ-дәрілерді және радарларды сатып алуға қосымша 6,1 миллиард еуро бөлуді мақұлдады.