АҚШ Өкілдер палатасы Ресейге қарсы санкцияларды қатаңдатуды мақұлдады

АҚШ Өкілдер палатасы марқұм республикашыл сенатор Линдси Грэм әзірлеп, ілгерілеткен Ресейге қарсы санкцияларды қатаңдату туралы заң жобасын қолдап дауыс берді, деп хабарлайды Tengrinews.kz тілшісі DW басылымына сілтеме жасап.

Енді құжат бұған дейін аталған бастаманы қолдайтынын мәлімдеген АҚШ президенті Дональд Трампқа қол қоюға жіберіледі.

БАҚ-та кейде "Грэм биллі" деп аталатын заң жобасы АҚШ лидеріне ресейлік мұнай мен газдың бес ірі сатып алушысына, сондай-ақ Ресей Федерациясына энергетикалық санкцияларды айналып өтуге көмектесетін бес елге 100 пайыздық баж салығын енгізуге мүмкіндік береді. Сонымен қатар құжатта Ресейден тұтынатын табиғи газдың 15 пайыздан азын алатын және бұл импортты қысқарту бойынша қадамдар жасап жатқан елдер үшін ерекше жағдайлар қарастырылған.

Дәл осы құжат АҚШ-тың Иранға қарсы санкцияларының мерзімін ұзартады.

The Hill басылымының жазуынша, бұл заң жобасы АҚШ Конгресінде 2024 жылдың сәуірінен бері Украинаға көмек көрсету тақырыбындағы алғашқы екіпартиялық бастама болды. Құжатты 262 конгрессмен (соның ішінде 203 республикашыл және 58 демократ) қолдап дауыс берсе, 159-ы (7 республикашыл және 152 демократ) қарсы шықты.

Өкілдер палатасы H.R. 5334 заңына Сенат енгізген түзетулерді 262-159 дауыс нәтижесімен мақұлдады. https://t.co/gfsPhruFlo

— House Press Gallery (@HouseDailyPress) 2026 жылғы 16 қыркүйек

Сонымен қатар демократтар Украинаға көмекті күшейтуді қолдағанымен, Трамптың кеден саясаты саласындағы өкілеттіктерінің айтарлықтай кеңеюін сынға алып жатыр.

"Америка Құрама Штаттарында өмір сүру тым қымбат. Неге Конгресс немесе Өкілдер палатасы президентке бүкіл әлем бойынша америкалықтар үшін кері экономикалық салдары болатын жаңа тарифтерді енгізуге шексіз өкілеттік беруі керек? Мен мұны істей алмаймын", – деп түсіндірді Өкілдер палатасындағы демократиялық азшылықтың көшбасшысы Хаким Джеффрис өз ұстанымын.

Заң жобасын жақтаушылар бұл құжат ұрыс қимылдары өршіп тұрған тұста АҚШ-тың Украинаны қолдайтыны туралы маңызды белгі болатынын айтады.

АҚШ Сенаты заң жобасын 7 тамызда 86 "жақтау", 11 "қарсы" дауыспен мақұлдаған болатын.