АҚШ та 13 штат Трамп әкімшілігін сотқа берді

Калифорния және тағы 12 штат Дональд Трамп әкімшілігін «жасыл» гранттарды тоқтатқан үшін сотқа берді. Әңгіме таза энергия жобаларына бөлінген 1,2 млрд долларлық гранттың күшін жою туралы болып отыр, деп хабарлайды АА.

Калифорния губернаторы Гэвин Ньюсом бұл шешімді «заңсыз» деп атап, оның салдарынан 200 мыңнан астам жұмыс орнына қауіп төнетінін және денсаулық сақтау саласында жылына шамамен 3 млрд доллар үнемдеуге мүмкіндік беретін жобалардың тоқтайтынын айтты.

Талап арызға қол қойғандар қатарында Колорадо, Коннектикут, Иллинойс, Мэриленд, Массачусетс, Нью-Джерси, Нью-Йорк, Орегон, Род-Айленд, Вермонт, Вашингтон және Висконсин бар. Ньюсом: «Біз Трампқа болашағымызды ірі демеушілеріне сатуға жол бермейміз» деді.

Сот шағымында гранттарды тоқтату Конституциядағы билік тармақтарының бөліну қағидасын бұзатыны көрсетілген. Бұған дейін де АҚШ соты Трамп әкімшілігінің 7,6 млрд долларлық гранттарды қысқарту шешімін «заңсыз» деп таныған болатын.

Бұл шешім 16 штаттағы таза энергия жобаларына әсер етті. Калифорниядағы сутегі энергетикасын дамытуға арналған 1,2 млрд долларлық хаб тоқтатылды, ал Техас пен кейбір шығыс штаттардағы жобалар қысқартудан босатылды.

Бүгін, 14:22