АҚШ тағы қарлы боран әуе рейстерін кешіктіріп, мыңдаған үйді жарықсыз қалдырды

Өткен демалыс күндері Техас штатынан бастап Мэн штатының ең оңтүстік шетіне дейінгі аумақты қамтыған дауыл жағдайды тым қиындатып, автожолдардағы қозғалысты тұралатып, электр энергиясының үзілуіне себеп болды және ірі қалаларды қалың қар басты.

АҚШ-тың бірнеше штатында кемінде он шақты адам көз жұмды. Ұлттық метеорологиялық қызметтің (NWS) мәліметінше, елдің солтүстік-шығысындағы кейбір өңірлерде соңғы 24 сағат ішінде 50,8 сантиметрден астам қар жауған. Ал Канада билігі дауыл Онтарио провинциясының оңтүстік бөлігіндегі тіршілікті айтарлықтай бұзғанын хабарлады.

Синоптиктердің ескертуінше, алдағы демалыс күндері АҚШ-тың шығыс бөлігінде тағы бір «күшті қысқы дауыл» соғуы мүмкін.

Дүйсенбі күні түске қарай Теннесси штатында 200 мыңнан астам адам электр жарығынан ажырады. Қалада қатты аяз орнап, тұрғындар суық пен қараңғылықта қалды.

«Жолдарды көптеген құлаған ағаштар мен электр желілері жауып тастады», — деп хабарлады BBC-ге Nashville Rescue Mission панасыздарға арналған баспанасының вице-президенті Джой Флорес.

Оның айтуынша, орталыққа электр жарығынсыз қалған тұрғындардан қоңыраулар келіп түскен.

Дүйсенбі күні америкалық әуе компанияларының жолаушылары рейстердің кешігуіне байланысты наразылық білдіруін жалғастырды. FlightAware деректеріне сәйкес, сол күні әуе компанияларында 19 мыңнан астам рейс кешіктіріліп, 5 900 рейс мүлде тоқтатылған.

Жағдайдың жақын арада жақсаратын түрі жоқ. Ұлттық метеорологиялық қызметтің мәліметінше, жұма күні басталуы мүмкін тағы бір қысқы дауылдың «ықтималдығы артып келеді». Бұл құбылыс АҚШ-тың шығыс бөлігін қатты аязбен қысып, құйғыта соққан қарлы боран әкелуі мүмкін.

АҚШ-тың метеорологиялық агенттігі синоптиктердің дауылдың нақты қозғалу бағытын және оның қай өңірлерге ең қатты әсер ететінін әзірге білмейтінін ескертті.

Айта кетейік, АҚШ-та қарлы боран салдарынан экономикалық шығын 100 млрд доллардан асуы мүмкін екені болжанды.