Ақтауда адамдар мінген катер жартасқа соғылды, қаза тапқандар бар

Қайғылы оқиға 30 тамыз күні кешке Ақтаудағы Каспий теңізінің айдынында болды. Серуендеу катері жартасқа соғылып, соның салдарынан екі адам қаза тапты, деп хабарлайды Tengri Travel Lada.kz басылымына сілтеме жасап.

Маңғыстау облысы Төтенше жағдайлар департаментінің мәліметінше, оқиға туралы хабарлама сағат 22:56-да түскен. Катер 5А шағын ауданы маңында жартасқа соғылған. Бортта жеті адам болған.

Құтқару операциясы кезінде бес адам жағаға жеткізіліп, медицина қызметкерлеріне тапсырылды.

Алдын ала мәлімет бойынша, катердегі тағы екі адамда құтқару кеудешесі болмаған. Іздестіру-құтқару жұмыстары барысында құтқарушылар жағадан шамамен 500 метр қашықтықта екі адамның мәйітін тауып, судан шығарды.

Операцияға ТЖД-ның 35 қызметкері, төрт техника мен төрт жүзу құралы жұмылдырылды. Сондай-ақ оқиға орнында 10 полиция қызметкері, төрт техника, Апаттар медицинасы орталығының мамандары мен бес жедел жәрдем бригадасы жұмыс істеді.

Оқиғаның мән-жайы мен себептері анықталуда, деп хабарлады ТЖД өкілдері.

Басылым тамыз айының басында Ақтауда серуендеу катерімен төтенше жағдай болғанын еске салады. Ол кезде кеме аударылып кеткен, бақытқа орай адам шығыны болған жоқ. Кеме аударылғаннан кейін жолаушылар суда бір сағаттай болған. Куәгерлердің айтуынша, маңайдан өтіп бара жатқан катерлер қараңғылық пен қатты музыканың салдарынан судағы адамдарды байқамаған көрінеді.

Google News арқылы жаңалықтарымызды қадағалаңыз