Ақтауда Мерседес мінген 17 жасар жасөспірім түнде қуыспақ ұйымдастырды

Маңғыстау облысында 17 жастағы жасөспірім Mercedes-Benz көлігімен сирена мен мигалка қосып соңына түскен полициядан қашып, түн ортасында қуыспақ ұйымдастырды. Жас жүргізушіні тек Ақтау қаласының ішінде ғана құрықтау мүмкін болды, деп хабарлайды Halyqstan.

Өңірлік Полиция департаментінің мәліметінше, жолдағы дүрбелең түнгі сағат 01:30 шамасында Мұнайлы ауданының Бесшоқы ауылы маңында басталған. Патрульдік полиция қызметкерлері күдікті «Мерседесті» тоқтатуға тырысқанымен, жүргізуші газды үдетіп, бой тасалауға әрекеттенген.

Тәртіп бұзушыны тек қала аумағында тоқтату мүмкін болды — полицейлер шетелдік көлікті Ақтау қаласының 33-шағынауданында қоршауға алды. Рөлде жүргізуші куәлігі жоқ, әрі кәмелетке толмаған жасөспірімнің отырғанын көрген тәртіп сақшылары таңданысын жасыра алмады.

Енді заңбұзушының отбасы мен көлік иесіне қомақты шығын келуі мүмкін.

«Жасөспірімге қатысты көлікті басқару құқығы жоқ тұлғаның полиция талабына бағынбауы дерегі бойынша әкімшілік хаттама толтырылды. Оған 60 АЕК (шамамен 260 мың теңге) көлемінде айыппұл салынуы мүмкін. Сондай-ақ көлік кілтін жүргізуші куәлігі жоқ адамға бергені үшін автокөлік иесі де жауапкершілікке тартылды», — деп хабарлады ведомстводан.

Бірақ мұнымен мәселе біткен жоқ. Полицейлер жасөспірімнің ата-анасын бала тәрбиесіндегі міндеттерін тиісінше орындамағаны үшін жауапқа тарту мақсатында іс материалдарын сотқа жолдады. Ал темір тұлпар айып тұрағына қойылды.

Бүгін, 10:36