Ақтауда қауіпсіздік талаптарына сай келмейтін дизель отыны тәркіленді

Ақтауда техникалық регламент талаптарына сәйкес келмейтін дизель отынын сату дерегі анықталып, өнім сот шешімімен тәркіленді. Бұл туралы Маңғыстау облысы бойынша техникалық реттеу және метрология департаменті мәлімдеді.

Ведомство инспекторлары жүргізген бақылау мақсатындағы сатып алу барысында белгіленген қауіпсіздік нормаларын бұза отырып дизель отынының сатылғанын тіркеген. Кейін арнайы зертханалық сынақтар нәтижесінде ДТ-Л-К4 маркалы дизель отыны Кеден одағының «Автомобиль және авиациялық бензинге, дизель және кеме отынына, реактивті қозғалтқыштарға арналған отынға және мазутқа қойылатын талаптар туралы» ТР ТС 013/2011 техникалық регламентіне сәйкес келмейтіні анықталды.

Атап айтқанда, тексерілген өнімдегі күкірттің массалық үлесі 115 мг/кг болған. Ал қолданыстағы талапқа сай бұл көрсеткіш 50 мг/кг-дан аспауы тиіс. Яғни, дизель отынындағы күкірт мөлшері рұқсат етілген нормадан 65 мг/кг-ға артық болып шыққан.

Анықталған заңбұзушылықтарға байланысты уәкілетті орган сотқа талап арыз жолдады. Маңғыстау облысының мамандандырылған ауданаралық экономикалық соты 2025 жылғы 19 қарашада талапты толық қанағаттандырып, кәсіпкерлік субъектісін техникалық регламентке сай келмейтін ДТ-Л-К4 маркалы дизель отынының тәркіленген партиясын иелену, пайдалану және оған билік ету құқығынан айырды.

Сот шешіміне сәйкес, аталған өнім иесінің өз қаражаты есебінен қолданыстағы заңнама талаптарын сақтай отырып жойылуға, кәдеге жаратылуға немесе қайта өңдеуге тиіс. Сондай-ақ дизель отынын Қазақстан Республикасының аумағынан тыс жерге шығару мүмкіндігі де қарастырылған.

Мамандардың айтуынша, бақылау мақсатындағы сатып алу шаралары тұтынушылардың құқықтарын қорғауға, азаматтардың қауіпсіздігін қамтамасыз етуге және мұнай өнімдері нарығында техникалық реттеудің міндетті талаптарының сақталуын бақылауға бағытталған.

Бүгін, 15:10