Ақтөбе облысында бір аптада жеті ауыл газдандырылды

Ақтөбе облысының ең шалғай ауылына көгілдір отын жетті.

Байғанин ауданының Оймауыт елді мекені табиғи газ желісіне қосылды. Жалпы өңірде соңғы жылдары газдандыру жұмыстары қарқынды жүргізіліп жатыр.  Биыл 31 ауыл көгілдір отынның игілігіне қол жеткізді. Тек соңғы 3 күнде 7 ауылға газ кіріп, 13 мың адам қамтылды.

Оймауыт ең шалғай ауылдың бірі. Облыс орталығынан 460 шақырым қашықта жатыр. 800-ге жуық тұрғыны бар елдімекенде 30-дан астам шаруа қожалығы бар. Экономикалық әлеуеті зор. Мектеп, мәдениет үйі, кітапхана, балабақша және дәрігерлік амбулаториясы жұмыс істеп тұр. Ауылға  газ құбырын жүргізу қымбат болса да, халық игілігі үшін республикалық бюджеттен 8 млрд 300 млн теңге қаражат бөлінді.

Талдыбай Талқанбаев, ауыл тұрғыны:

- Мына біздің ауылымызға сондай бір үлкен көмек болды. Су келді. Газ мінекей келіп тұр. Жол жасалып жатыр, мектеп салынып жатыр. Мына клубты қайта жөндеуге ақша бөлініп қойды. Біз не сұраныс жасадық, қандай өтініш жасадық мына Ақтөбе облыстық әкімі бір жылға жеткізбей уәдесін орындап жатыр. 

Биыл өңірде газдандыру жұмыстары рекордтық көрсеткішке жетіп, 31 ауылға газ барды. Оймауытпен қатар Байғанин ауданының Қаражар, Шалқар ауданына қарасты Бершүгір, Сарысай және Алабас, Мәртөк ауданының Аққайың, Покровка елдімекендері көгілдір отын желісіне қосылды.

Серік Дәулетов, облыстық энергетика және ТҮКШ басқармасы басшысының орынбасары:

- Негізгі жоспар ағымдағы жылы 28 елді мекен болған. 3 елді мекен 2026 жылы бітуі керек болды. Алайда мердігер мекеме тарапынан жоспарларын жеделдетіп, 3 елді мекен толығымен аяқтады ағымдағы жылы. Бюджеттен 8,6 млрд теңге қарастырылды. 

Қазір Ақтөбе облысындағы 319 елді мекеннің 203-інде табиғи газ бар. Көгілдір отынды өңір халқының 97,1 пайызы тұтынып отыр. Келесі жылы тағы 23 ауылды қамтитын 17 жобаны жүзеге асыру көзделген.

Мансұр Есқожин, Айнадин Молдабеков, Айбек Даутов