Ақтөбеде қаланың 600 мыңыншы тұрғыны дүниеге келді

Ақтөбе халқының саны 600 мың тұрғынға толды. Қаланың 600 мыңыншы тұрғыны - Мансұр есімді нәресте. Мұндай ресми деректі бүгін Қазақстан Республикасы Ұлттық статистика бюросының Ақтөбе облысы бойынша департаменті жариялады.

Ақтөбе халқының саны 600 мың тұрғынға толды. Қаланың 600 мыңыншы тұрғыны - Мансұр есімді нәресте. Мұндай ресми деректі бүгін Қазақстан Республикасы Ұлттық статистика бюросының Ақтөбе облысы бойынша департаменті жариялады.

Қала әкімдігі мәліметінше, ол Құрмашевтар отбасында дүниеге келген. Қала әкімі Азамат Бекет осы қуанышты сәтте жас отбасының шаңырағына сыйлығымен арнайы барып, ақжарма тілегін білдірді.

Әкімдікте Құрмашевтар әулеті еңбекқор, Ақтөбенің нағыз үлгісі екені атап өтілді. Отбасы отағасы Жасұлан телекоммуникация саласында жұмыс істейді, ал анасы Айсұлу - жас дәрігер. Кішкентай Мансұр - отбасының тұңғышы және көп жыл зауытта еңбек еткен Амангелді Құрмашевтің алғашқы немересі.

Ведомство мәліметінше, кездесу өте жылы әрі ерекше мейірлі өтті. Нәрестенің әжесі Алуаш апай ізгі дәстүрмен "ырым болсын" деп, қала әкіміне Мансұрдың иткөйлегін сыйға тартты. Бұл - жақсылықтың нышаны, қаламызға береке мен ырыс әкелсін деген ақ тілек еді.

Азамат Бекет халық санының қарқынды өсуі - Ақтөбенің дамуы мен тартымдылығының басты көрсеткіші екенін атап өтті.

"Қаламыз соңғы жылдары тек сан жағынан емес, ауқымы жағынан да едәуір өсті. Жаңа үйлер бой көтеріп, инфрақұрылым жақсаруда. Біздің басты мақсатымыз - әрбір тұрғынға жайлы орта қалыптастыру. Әрине, біз үшін әлеуметтік нысандарды салу - ең басты басымдық", - деді әкім.

Қала басшысының айтуынша, халық санының артуына байланысты білім беру саласына ерекше көңіл бөлініп жатыр. Қазір Ақтөбеде 121 мектеп жұмыс істейді (оның 8-і соңғы бір жарым жылда ашылған) және 245 балабақша бар. Әкімдік мәліметінше, жаңа нысандар салу жұмыстары алдағы уақытта да жалғасады.

Суреттер: Ақтөбе қаласы әкімдігінің баспасөз қызметінен

Статистика департаментінің басшысы Айбек Ғалымжановтың айтуынша, 600 мыңыншы тұрғынды анықтау қатаң демографиялық әдістеме бойынша жүргізілген.

"Біз туу, қайтыс болу және көші-қон процестерін сағат сайын қадағалап отырдық. Осы деректер негізінде қала халқының саны 600 мыңға жеткен сәтте дүниеге келген нәресте анықталды", - деді ол.

Қала әкімдігі Құрмашевтар әулетін және барша ақтөбелікті осы тарихи сәтпен құттықтады.

Ақтөбе қаласы әкімдігінің баспасөз қызметі ұсынған материал