Ақтөбеде жас ұшқыштар кабинеті ашылды

Ақтөбедегі Әуе Қорғаныс күштерінің әскери институтында енді мектеп оқушылары да білім алатын болды.

Жоғары оқу орнында жас ұшқыштарға арналған дәріс класстары ашылды. Авиация тарихын зерделеп жүрген жеткіншектер түрлі әуе көліктерімен танысып, басқаруды үйренеді.

Сержан Зұлқарнай орта мектепті тәмәмдаған соң азаматтық авиация академиясына оқуға түсуді армандайды. Жеткіншек әуе көліктерімен 9-шы сыныптан бастап етене танысып жүр. Аптасына үш рет ғарышкер Виктор Пацаев атындағы жас ұшқыштар мектебінде тәлім алады. Сабақтар енді әуе қорғаныс күштерінің әскери институтында өтетініне дән риза.

Сержан Зұлқарнай, оқушы:          

- Бізге арнайы дәрісхана берілген соң осы жақта өткен дұрыс және ыңғайлы деп ойлаймын. Неше түрлі ұшақтардың моделін көреміз, классқа келген соң тереңдетіп оқимыз. Өзіме Ил-2 ұнайды. Отыратын жерлері кең.

Ақтөбелік ғарышкер Виктор Пацаев атындағы жас ұшқыштар мектебінде 9-сыныпқа көшкен оқушылар білім алады. Олар әуе көліктерінің тарихын оқып, аэронавигацияны үйренеді. Авиациялық психологиямен танысады. Сонымен қатар бағдарламада дене шынықтыру мен нысананы көздеп ату да бар. Кәсіби бағдар беретін білім ордасына түсем деушілер қатары соңғы жылдары күрт өскен.

Олег Коженков, В.Пацаев атындағы жас ұшқыштар мектебінің оқытушысы:

- Осыдан 5-7 жыл бұрын бірінші курсқа балалар топырлап келгенімен кейін көбі қатыспай кететін еді. Қазір қызығушылық артып отыр. Мәселен биыл 50-ден астам оқушы қабылдадық. Олардың ішінде 6-ы қыздар. Барлығы да қалмай келіп дүр.

Қазір жас ұшқыштар мектебінде 104 бала білім алып жүр. Ескі ғимаратқа сыймаған соң Талғат Бигелдинов атындағы Әуе қорғаныс күштері әскери институтында үш кабинет ашылған. Қажетті жиһаз бен құрал-жабдықтарға қаражат жергілікті бюджеттен бөлінді.

Мұхтар Нұрмұхамедов, В.Пацаев атындағы жас ұшқыштар мектебі директорының орынбасары:

- Әскери институт басшылығы ұсынысымызды қабыл алып, бірден үш кабинет бөлді. Қазір сабақтарымыз осында өтіп жатыр. Сонымен қатар курсанттардың жаттығу алаңдарында дәріс өткізуге мүмкіндік бар.

Биыл жас ұшқыштар мектебін 26 оқушы тәмәмдаған. Олардың басым көпшілігі азаматтық авиация академиясы мен әуе қорғаныс күштерінің әскери институтының курсанты атанды. Ал жалпы 60 жылға жуық тарихы бар балаларға кәсіптік бағдар беретін жас ұшқыштар мектебінің мың жарымнан астам түлегі авиация саласында еңбек етіп жүр.

Авторлары: Мансұр Есқожин, Айнадин Молдабеков, Айбек Даутов