Астанада педагогтерді психологиялық қолдау кабинеті ашылды

Қазақстанда алғаш рет педагогтерге арналған психологиялық қолдау кабинеті ашылды. Енді арнайы мамандар мұғалімдердің менталды саулығын қадағалап, қамқорлық жасайды.

Осылайша, күйзеліске түскен ұстаздарды дер кезінде анықтап, алдын алу көзделген.

Тың бастаманы Оқу-ағарту министрлігі қолға алды. «Өрлеу» біліктілікті арттыру ұлттық орталығының мәліметінше алғашқы кабинеттер Түркістан мен Ақтөбе облыстарының орталық филиалдарында ашылған. Онда педагогтерге арналған психологиялық қолдау көрсетіледі.

Аида Мейірқұлова, «Өрлеу» біліктілікті арттыру ұлттық орталығы басқарма төрағасының орынбасары:

- Алдымен педагогтың психологиялық жағдайын анықтаймыз. Ол үшін ұстаздар өз еркімен арнайы сауалнамадан өтеді. Содан кейін көмек көрсетеміз. Филиалдардағы кабинеттер жұмысқа қажетті барлық құралдармен жабдықталған.

Бұл кабинеттерде кәсіби психолог жеке және топтық кеңес өткізеді. Сонымен қатар, түрлі тренингтер мен психологиялық диагностика жүргізеді. Алдағы уақытта осындай кабинетті еліміздің басқа өңірлерінде де ашу жоспарланып отыр.

Аида Мейірқұлова, «Өрлеу» біліктілікті арттыру ұлттық орталығы басқарма төрағасының орынбасары:

- Енді қаржыландыру мәселесін шешу керек. Себебі бұл кабинеттер Өрлеу орталығының  бастамасымен өз қаржымызға салынды. Келесі кабинеттерді демеушілердің көмегімен немесе қосымша қаражат тарту арқылы ашамыз деп ойлаймын. Өйткені барлық филиалдарда ұстаздарға психологиялық көмек көрсетілуі керек.

Бүгінде екі филиалда 465 мұғалімге көмек көрсетілген. Бұл қызметтерді педагогтер «Өрлеу» орталығында біліктілікті арттыру курстарынан өту кезінде пайдалана алады. Жұмыс барысында этикалық нормалар, еріктілік және құпиялылық қағидаттары қатаң сақталады.

Авторлары: Серік Селеубайұлы, Айсұлу Махмұтова