Ақмола облысында 22 робототехника кабинеті ашылды

Ақмола облысында биыл 22 робототехника кабинеті ашылды. Олардың басым бөлігі ауыл мектептерінде орналасқан.

Қазір аймақта оқушылар арасында аталған сала жақсы дамып келеді. Нақтырақ айтсақ, 2 мыңға жуық бала құлтемір құрастыруға ден қойған.

Бурабайлық Әуес Амантай мына құлтемірді құрастыруға нәбәрі 2 ай уақытын жұмсапты. Өнертапқыш өрен Қызылағаш ауылындағы орта мектепте білім алады. Робототехникамен айналысқанына 3 жыл болған. Осы уақыт аралығында 7 бірдей халықаралық жарыста топ жарып, жүлдегер атаныпты.  

Әуес Амантай, оқушы:

- Ең есімде қалғаны Түркия мемлекетінде болған жарыс. Біз онда Астанада 650 команданың ішінен орын алып, Түркияға барып 13 мемлекет қатысқан жарыста екінші орын алдық. Сол арқылы Итальяға жолдама алдық.

Қазір ауыл балалары робот құрастаруда алдына жан салмайды. Құлтемір жинаудың қыр-сырын әбден меңгеріп алған.

Мадияр Қайрат, оқушы:

- Роботты құрастыру қолдың моторикасын дамытады. Баланың, жалпы адамның ойын дамытады. Роботты құрастырғанда оның әр размерін қадағалап отыру керек. Оның маторлары қалай тұрғанын қадағалап отыру керек.

Қызылағаш ауылындағы робототехника үйірмесі 2018 жылы ашылған. Міне, содан бері жеткен жетістік пен бағындырған белес көп. Темірге жан бітірем деген балалар саны да жыл санап көбейіп келеді,-дейді үйірме жетекшісі. Сол себепті биыл оларға әкімшілік ғимаратынан арнайы жабдықталған жаңа робототехника кабинеті берілді.

Нұржан Әбілжанов, робототехника үйірмесінің жетекшсі:

- 2018 жылдары робототетехника саласы Қазақстанға енді ене бастаған кезеңде қиындықтар туындады. Оқушылар саны аз болды. Бірақ жарыс кезінде чемпионаттарда оқушыларды қатыстыру, әрі қарай дамыту мақсатында басқа елдімекендерден роботтар жинап, оқушылардың қызығушылығын арттырдым. Қазіргі кезде ауылымызда 30 бала тәрбиеленуде.

Құлтемір құрастыруға қаламен қатар ауыл мектептері де ерекше ден қойған. Қазір өңірдегі 200-ден аса  робототехника кабинеттерінде 2 мыңға жуық бала тәлім алады.

Рустам Күлниязов, Аймақтық жаңа технологиялар орталығы директорының орынбасары:

- Ақмола облысында ІТ сыныптар деген тегін сабақтар өтіледі. Сол ІТ сыныптардың ішінде робототехникаға үйрендік. Одан бөлек жасанды интеллектінінің бағыты бойынша робототехникада қолдану бағытында жұмыс жасайды.

Робототехникадан сабақ беретін мұғалім дайындауға да баса мән беріледі. Жылына 20 шақты информатика пәнінің ұстазы робот құрастыру курсынан өтіп тұрады. 

Авторлары: Абзал Балтабаев, Евгений Шинкаренко