Ақтөбеде 19 спорт нысаны ашылды

Ақтөбе облысында соңғы 2 жылда 19 спорт кешені ашылды. Нәтижесінде өңірде бұрын болмаған спорт түрлері дами бастады.

Жалпы халықтың 44 пайызы  тұрақты түрде спортпен шұғылданады- дейді мамандар. Бұқаралық спорттың дамуына спорт нысандарының көбеюі себеп.

Бадминтон - Ақтөбе облысында кенже дамып келе жатқан спорттың бірі. 2022 жылы ғана ашылған. Қазір облыс орталығынан бөлек үш ауданда үйірмелер жұмыс істеп тұр. Балалардың олимпиада бағдарламасына енген спорт түріне қызығушылығы жоғары.

Қызылжар ауылындағы спорт мектебінде 20 оқушы бадминтонның қыр-сырын үйреніп жүр. Жеткішектер республикалық және халықаралық жарыстарда бақ сынап үлгерген.

Ерлан Жақсылық, жаттықтырушы:

- 2025 жылы қараша айында Өскемен қаласында өткен 2015 жылы туған және одан да кіші балалар арасындағы біріншілікте спортшыларымыз командалық есепте үшінші орын алды. Армения елінде өткен халықаралық турниге алғаш рет қатысып, өздерінің бағын сынап көрді.

Жалпы жаттығу залдарында бадминтоннан бөлек футбол, волейбол, баскетбол және күрес үйірмелері бар. Балалар мен жасөспірімдер мектебіне тиесілі екінші ғимараттағы бассейнде Есет батыр ауданы мен Қызылжар ауылының оқушылары су спортымен шұғылданады. Үйірмелерге 700-ден астам жеткішек жазылған.

Ольга Жәнібекова, №3 балалар мен жасөспірімдер спорт мектебінің директоры:

- Қызылжар елді мекенінде тек орта мектептің базасында дене шынықтыру сабағында балалар жаттыққан болатын. Қазіргі таңда 2025 жылдан бастап берілгесін осындай спорт түрлері ашылды. Бұрынғы кездері ата-аналар балаларды қалаға таситын. Қазір мына жақта салынған соң балаларға мүмкіндік бар.

Ернар Сқақов, оқушы:

- Мектептен босасам екі жарымда келе аламын, тағы үлкендермен бес жарымда келуіме болады. Үлкендермен жаттыққан жақсырақ. Өйткені мықтырақ ойнайды және одан да жақсы ойнайсың. Алдыңғы жылы мектеп лигасында 9-10-11 сыныптар аралығында бірінші орын алдық.

Қазір дене шынықтыру-сауықтыру кешендері облыс орталығының барлық шағын ауданында жұмыс істеп тұр. Соңғы екі жылда 9 нысан ашылған. Спорт үйірмелеріне 26 мыңнан астам бала қатысады. Маман тапшылығы болғаннан кейін жергілікті билік жаттықтырушыларды өзге өңірлер мен алыс-жақын шетелден алдыртып жатыр.

Мейрамбек Махамбетов, облыстық Дене шынықтыру, спорт және туризм басқармасының басшысы:

- Мәскеуден келген маман бүгінгі күні жас шорт-трекшілермен жұмыс істеп жатыр. Сонымен қатар қаңтар айынан бастап семсерлесу спорт түрінен Алматы қаласынан екі маман келді. Және де наурыз айынан бастап Шымкент қаласынан мәнерлеп сырғанауға тағы да маманымыз келеді. Тағы да ерекше атап өтетініміз ол үстел теннисі спорт түрінен бізге Хорватиялық маман 2026 жылдың ақпан айынан бастап жұмысын бастайтын болады.

Биыл облыста 15 спорт нысаны ашылады деп жоспарланып отыр. Оның бесеуі Ақтөбеде ,  қалғаны   шалғайдағы ауылдарда салынады.

Авторлары: Мансұр Есқожин, Болатбек Молдағалиев, Айбек Даутов