Арандату ақтау емес : Атыраудағы ЕМГ топ менеджеріне қатысты даулы іс

Сот полиция әрекетін арандатушылық деп тапса да, Ильяс Құрамысов 15 тәулікке қамалып, жүргізуші куәлігінен айырылды. Оның адвокаты әділдікке қол жеткізу үшін жоғары сотқа жүгінбек.

Жақында ел жаңалықтарында «Ембімұнайгаз» АҚ-ның коммерциялық мәселелер жөніндегі бас директордың орынбасары Ильяс Құрамысовтың мас күйінде көлік жүргізгені туралы ақпарат тарады. 15 желтоқсанда ол «сау жүргізуші» қызметін пайдаланғанымен, тұрғын үй кешенінің тұрағына өзі кіріп, сол жерде оны патрульдік полиция ұстап алған. Медициналық тексеру оның жеңіл дәрежеде мас болғанын анықтады.

Сол күні Атырау қалалық әкімшілік сотының судьясы Алмагүл Ерғазиева оған 15 тәулік қамау және жеті жылға жүргізуші куәлігінен айыру жазасын тағайындады. Құрамысов кінәсін мойындаған жоқ, ал адвокаттың істі уақытша тоқтатып, кінәсіздігін дәлелдейтін айғақтар мен бейнежазбаларды ұсынуға мүмкіндік беру туралы өтінішін судья қабылдамады.

«Сот И.Құрамысов пен оның адвокатының дәлелдерін қорғау тарапынан ұсынылған ұстаным ретінде қарастырып, олар сот процесінде өз дәлелін таппағанын атап өтті», – делінген сот қаулысында.

Ал адвокат Тілек Хамитовтың айтуынша, полицияның Жедел басқару орталығы мен «Арман» тұрғын үй кешеніндегі бейнежазбалар оның қорғауындағы азаматтың жауаптарын растап қана қоймай, ашық арандатуды да дәлелдейді.

«Тұрғын үй кешенінің алдында “сау жүргізуші” көлікті тұраққа кіргізбей, кіреберісте қалдырған. Құрамысов салонда қалып, жүрегі ауырып, ұйықтап кеткен. Оны полиция бақылап отырған болуы мүмкін, өйткені біраздан соң қозғалыссыз тұрған BMW-ді бір азамат тексеріп, кейін полицей көлігіне отырған. Кейін оның экипажға бекітілген мобилограф екені белгілі болды. Артынша тағы бір адам келіп, фонарикпен жарық түсіріп, терезені қағып, Құрамысовты оятып, қайтадан полиция көлігіне жүгіріп барған. Қорғалушымның айтуынша, ол да қарапайым киімде болғанымен, видеода полиция формасына тән жарық шағылыстыратын жолақтары бар шалбар кигені көрінеді. Сол адам Құрамысовтан «Атырау облысы Су Арнасы» көлігіне жолды босату үшін көлікті 15–20 метрге жылжытуды сұраған. Бір минут өтпей-ақ, оның артынан екі полиция экипажы келіп кірген», - дейді адвокат.

26 желтоқсанда апелляциялық сот бейнежазбаларды қарап, оқиғаға қатысушылардың сөздерін тыңдап, полицияның әрекетін заңсыз әрі құқық бұзуға арандату деп таныды. Осыдан кейін судья Тәтті Уәлиева Атырау облысы полиция департаментінің басшылығына тиісті шара қабылдау туралы жеке қаулы шығарды. Бірақ 15 желтоқсандағы әкімшілік соттың шешімі күшінде қалды. Яғни, адам амалсыздан құқық бұзушыға айналса да, кінәлі деп есептелді.

«Қазір біз істі қайта қарау туралы өтінішті кассациялық сот төрағасына жолдадық. Сонымен қатар, полиция қызметкерлерін лауазымдық өкілеттігін асыра пайдаланғаны үшін қылмыстық жауапкершілікке тарту жөнінде прокуратураға арыз беруді қарастырып жатырмыз», – деді адвокат Т. Хамитов. 

Айтпақшы, өткен жылы дәл осындай жағдай Қарағандыда да болған.

Еске сала кетсек, жақында елордада полиция қызметкерлері мас күйінде және мерзімі өткен жүргізуші куәлігімен көлік жүргізген судьяны ұстады. Аталған тұлғаға тек әкімшілік айыппұл салынды.

Лев ГУЗИКОВ

Сурет: emba.kz

Видеоны адвокат ұсынды

Бүгін, 13:28