Арман Шаққалиев: Конституцияны жаңарту бизнес пен экономиканың орнықты дамуына арналған берік құқықтық негіз

Елімізде Қазақстан Республикасы Конституциясының жаңа редакциясы жобасына қатысты маңызды қоғамдық диалог жүріп жатыр, – деп хабарлайды Aikyn.kz сайты. 

Бұл туралы Сауда және интеграция министрі Арман Шаққалиев мәлімдеді.

Министрдің айтуынша, қазіргі талқылау формалды үдеріс емес, мемлекеттің қоғаммен бірге еліміздің болашағы жөнінде жүргізіп отырған ашық әрі жауапты пікір алмасуы болып отыр.

«Қоғам Қазақстан Республикасы Конституциясының жаңа редакциясы жобасын қызу талқылауда. Бұл формалды үдеріс емес, мемлекеттің қоғаммен бірге еліміздің болашағы жөнінде жүргізіп отырған ашық әрі жауапты пікір алмасуы», – деді Арман Шаққалиев.

Оның айтуынша, азаматтардың өз ұстанымын белсенді білдіріп, ұсынылып отырған өзгерістерді әлеуметтік желілерде, қоғамдық алаңдарда және кәсіби ортада кеңінен талқылауы ерекше маңызды.

«Бұл қоғамның саяси және азаматтық тұрғыдан кемелденгенін, сондай-ақ мемлекеттік басқару жүйесінің ашықтығын айқын көрсетеді», – деді министр.

Сонымен қатар Арман Шаққалиев «Күшті Президент – ықпалды Парламент – есеп беретін Үкімет» тұжырымдамасы билік тармақтары арасындағы орнықты тепе-теңдікті қамтамасыз ететінін де атап өтті.

«Бұл саяси жүйенің тұрақтылығы мен болжамдылығын қалыптастырады. Сауда және кәсіпкерлік саласы үшін бұл стратегиялық маңызға ие, себебі ол экономикалық саясаттың сабақтастығын, заңнамалық бастамалардың айқындығын және мемлекеттік басқарудың тиімділігін қамтамасыз етеді», – деді ол.

Министрдің сөзінше, мемлекеттік басқарудың теңгерімді жүйесі инвесторлардың сенімін арттырып, шағын және орта бизнестің орнықты дамуына, сыртқы экономикалық байланыстарды кеңейтуге және сауда нарығының тұрақтылығын қамтамасыз етуге қолайлы жағдай жасайды.

«Мемлекеттік саясаттың болжамдылығы қолайлы іскерлік ахуалды қалыптастырудың және ұзақмерзімді экономикалық өсімді қамтамасыз етудің негізгі факторларының бірі», – деді А.Шаққалиев.

Сондай-ақ ол Конституцияның жаңа редакциясы сау әрі бәсекеге қабілетті экономиканың іргетасын құрайтын базалық қағидаттарды нығайтатынын айтты.

«Жаңартылған Конституцияның өзегінде адам, оның құқықтары мен бостандықтары тұрғаны аса маңызды. Меншік құқығын қорғау, әділдік, заң мен тәртіп қағидасы ең жоғары құқықтық деңгейде бекітіледі», – деді министр.

Бұл нормалар инвестициялық ахуалға, экономиканың бәсекеге қабілеттілігіне және азаматтардың өмір сүру сапасына тікелей әсер етеді.

Министр бизнес үшін ерекше маңызды бірқатар негізгі ережелерге де тоқталды. Атап айтқанда:

– инновациялық бизнес, креативті индустриялар және экспортқа бағдарланған компаниялар үшін зияткерлік меншікті қорғау;

– азаматтар мен кәсіпкерлік субъектілерінің жағдайын нашарлататын заңдарға кері күш беруге тыйым салу;

– цифрлық ортада азаматтардың құқықтарын конституциялық деңгейде бекіту.

Министрдің айтуынша, бұл нормалар электрондық коммерцияны, цифрлық сауданы және технологиялық кәсіпкерлікті дамытуға жаңа мүмкіндіктер ашады.

Сонымен қатар Қазақстанның ашық экономика ретіндегі ұстанымы да Конституцияда көрініс табуға тиіс.

«Қазақстан дәстүрлі түрде ынтымақтастық пен халықаралық интеграцияға бағдарланған ашық экономика ретінде қалыптасқан. Конституцияда орнықты даму қағидаттарын, халықаралық нормалар мен шарттық міндеттемелерді құрметтеуді бекіту Қазақстанға жауапты әрі болжамды серіктес ретінде деген сенімді нығайта түседі», – деді Сауда және интеграция министрі Арман Шаққалиев.

Оның сөзінше, бұл экспортты ұлғайтуға, инвестиция тартуға және жаһандық экономикалық үдерістерге белсенді қатысуға мүмкіндік береді.

«Түптеп келгенде, Конституцияны жаңарту – абстрактілі тұжырымдар жиынтығы емес, бизнес пен ұлттық экономиканың орнықты дамуына арналған берік құқықтық негіз. Бүгін бізде еліміздің одан әрі өркендеуі үшін сенімді әрі ұзақмерзімді іргетасты бірлесе қалыптастыруға бірегей мүмкіндік бар», – деп өз сөзін түйіндеді министр.