Армения Еуразиялық экономикалық одаққа қатысты ұстанымын жариялады

АСТАНА, 29 мамыр – Sputnik. Арменияның вице-премьері Мгер Григорян осы елдің Еуразиялық экономикалық одаққа қатысты ұстанымын жариялады, деп хабарлайды Sputnik Қазақстан тілшісі.

Григорян Астанадағы Жоғары Еуразиялық экономикалық кеңестің отырысына қатысып жатыр.

"Армения Республикасы өзара құрмет негізінде және ЕАЭО мүше барлық елдің мүдессін ескере отырып, одақ жұмысына ары қарай адал қатысуға мүдделі", - деді Григорян кеңестің кеңейтілген отырысында.

Еске сала кетейік, бұған дейін Армения сыртқы істер министрі Арарат Мирзоян Ереван шешім қабылдайтын уақыт келгенде ЕАЭО мен Еуропалық одақ арасында таңдау жасайтынын мәлімдеген болатын.

"Біз әрдайым айтып жүрміз: Армения ЕАЭО мен ЕО арасында таңдау жасайтын сәт туғанда, біз, әрине, сол таңдауды жасаймыз... Қазіргі таңда біз ЕАЭО мүшесіміз және одақтағы қызметімізді жалғастырып келеміз. Сонымен қатар Армения халқының Еуропаға ұмтылып жатқаны да жасырын емес. Шешім қабылдайтын уақыт келгенде, біз оны қабылдаймыз", – деді Мирзоян.

Астанадағы отырысқа одаққа мүше мемлекеттер басшыларымен қатар, Өзбекстан Республикасының президенті Шавкат Мирзиёев, Куба Республикасының вице-президенті Сальвадор Вальдес Меса және Иран Ислам Республикасының өнеркәсіп, кеніштер және сауда министрі Сейед Мохаммад Атабак қатысып жатыр. Олар байқаушы мәртебесіне ие.