Арнайы ХҚКО лардағы жемқорлық: Астана мен өңірлерде филиал басшылары ұсталды

Астанада Арнайы ХҚКО басшысының бұрынғы орынбасарына азаматтарға емтихан тапсыруға және жүргізуші куәлігін алуға көмектескені үшін жүйелі түрде 60 рет пара алды деген айып тағылды. Параның жалпы сомасы 100 млн теңгеден асады, деп хабарлады Қазақстан Ұлттық қауіпсіздік комитеті баспасөз қызметі.

Ведомство мәліметінше, 2026 жылдың басынан бері Астана қаласында, Ақмола және Павлодар облыстарында авто-мектептердің қызметін ұйымдастыру мен жүргізуші куәліктерін рәсімдеу кезінде заңсыз сыйақы алу және қызметтік өкілеттіктерді асыра пайдалану деректері анықталған.

Атап айтқанда, Астанада Арнайы ХҚКО басшысының бұрынғы орынбасары әшкереленді. Ол жүйелі түрде пара алып, азаматтарға емтихан тапсыруға және жүргізуші куәлігін алуға көмектесіп отырған. Тергеу барысында жалпы сомасы 100 млн теңгеден асатын 60-тан астам дерек құжатталған.

Сондай-ақ Көкшетаудағы Арнайы ХҚКО филиалының және Екібастұздағы «Азаматтарға арналған үкімет» мемлекеттік корпорациясы филиалының басшыларының заңсыз әрекеттері тоқтатылды. Оларға жалған тұлғалар арқылы емтихан тапсыруды ұйымдастырғаны үшін ақша алған деген айып тағылып отыр.

Бұдан бөлек, Астана, Шымкент және Тараз қалаларындағы корпорация филиалдарында лауазымды тұлғалардың мүлікті қайта тіркеу мен ауыртпалықтарды алып тастау кезінде өкілеттіктерін асыра пайдаланып, заңсыз баюы мүмкін деген күдік туындады.

Аталған фактілер бойынша сотқа дейінгі тергеу жүргізілуде. Қылмыстық-процестік кодекстің 201-бабына сәйкес өзге ақпарат жария етілмейді, деп хабарлады ҰҚК.