Арқалық әуежайы 20 миллиардқа: ашылғаннан кейін оған не болды

Арқалық әуежайының ресми жұмыс істеп тұрғанына бір айдан асты. Tengri Travel Қостанай облысының жолаушылар көлігі және автомобиль жолдары басқармасынан қазір әуе айлағының қызметін қанша жолаушы пайдаланып жатқанын, қандай рейстер орындалатынын және нысанның болашағы туралы сұрады.

Әуежайдың қазіргі жұмыс барысы

Арқалықтағы "Ахмет Байтұрсынұлы атындағы Қостанай халықаралық әуежайы" АҚ филиалы әуежай операторы болды.

Анықтама: Өңір басшысы бұған дейін әуежай қажетті сертификаттардың толық пакетін алғанын атап өтті. 3 тамызда авиациялық қауіпсіздік қызметі сертификатталды, 18 тамызда "Қазаэронавигация" мекемесі аэронавигациялық қызмет көрсетуге сертификат берді, ал 21 тамызда аэродромның жарамдылық сертификаты алынды.

Қазір әуе айлағы сыйымдылығы 70 адамға дейінгі өңірлік жолаушылар ұшақтарын, соның ішінде Dash 8 Q400 және CRJ200 әуе кемелерін қабылдай алады.

Соңғы мәліметтерге сәйкес, әуе айлағы аптасына 12 рейске қызмет көрсетеді, ал жолаушылар орындарының орташа жүктемесі шамамен 95 пайыз. Ай сайынғы жолаушылар ағыны шамамен 2 236 адамға жетеді.

Арқалық әуежайы. Фото: Қостанай облысының жолаушылар көлігі және автомобиль жолдары басқармасы

Арқалықтан тұрақты рейстер Алматы, Астана және Қостанай бағыттары бойынша орындалады. Әуе тасымалына сұраныс сақталса, ұшу жиілігін арттыру және жаңа бағыттар ашу жоспарланған. Қазіргі кесте 31 желтоқсанға дейін күшінде болады.

Сондай-ақ басқарма өкілдері ауа райы қолайлы болған жағдайда ұшуларды бүкіл қысқы маусым бойы орындау жоспарланғанын атап өтті.

2027 жылғы 1 қаңтардан бастап конкурс қорытындысы бойынша қызмет көрсетуші анықталғаннан кейін жаңа ұшу кестесі бекітілмек.

Арқалық әуежайының ішкі көрінісі. Фото: Қостанай облысының жолаушылар көлігі және автомобиль жолдары басқармасы

Ведомство мәліметінше, Арқалық әуежайын дамыту жобаларының жалпы сметалық құны 20 436 087 000 теңге. Бұл сомаға жаңа терминал салу және ұшу-қону жолағын, рөлдеу жолағы мен перронды реконструкциялау жұмыстары кіреді.

Автономды қазандығы бар бірінші кезектегі терминал құрылысына шамамен 7,77 миллиард теңге, екінші кезекке - шамамен 2,47 миллиард теңге бөлінді. Тағы 10,2 миллиард теңге ұшу-қону жолағын, рөлдеу жолағы мен перронды жаңартуға жұмсалды.

Жұмыс аясында апаттық-құтқару станциясы, арнайы техника гаражы, бақылау-өткізу пункті және диспетчерлік мұнара да салынды.

Басқарма ақпараты бойынша, терминалдың екінші кезеңінде жұмыстар әлі де жүріп жатыр. Атап айтқанда, мамандар навигациялық жабдықтарды, сондай-ақ қолжетімділікті бақылау және басқару жүйелерін монтаждаумен айналысады.

Өңірлік басқарма әуе айлағының әрі қарай дамуына жеке отын құю кешенінің жоқтығы кедергі келтіріп отырғанын нақтылады. Болашақта оның құрылысы жоспарланған.

Ведомство ұшу-қону жолағын күшейту мүмкіндігі туралы да хабарлады. Алайда бұл мәселе жолаушылар ағыны мен рейстер саны артқан жағдайда ғана қарастырылады.

Сондай-ақ мекеме әуе айлағын қалпына келтірудің өзін-өзі ақтау мерзіміне жеке есептеулер жүргізілмегенін хабарлады. Алдағы уақытта қаржыландыру әуе тасымалына сұранысқа байланысты болады және жергілікті бюджет есебінен жүзеге асырылады.

22 тамызда Арқалық әуежайынан алғашқы рейс орындалса, 1 қыркүйектен бастап тұрақты әуе қатынасы басталды.

Еске сала кетейік, 2020 жылы жеке меншік иесі нысанды хабарландыру сайтында сатуға шығарған болатын. 2024 жылдың желтоқсанында Қостанай облысының әкімдігі әуежайды 20,7 миллион теңгеге сатып алып, әуе айлағы мемлекет меншігіне қайтарылды.
Тағы оқыңыз: Арқалық әуежайында маңызды өзгеріс болды

Бізді Google-дың негізгі дереккөздер тізіміне қосыңыз