Арқалықта қаңырап қалған ғимараттар жөндеуден өтті

Арқалықта отыз жылға жуық қаңырап, бос тұрған бес қабатты үй толық жөндеуден өтті. Бұл шағын шаһарда осы жыл ішінде тұрғындардың игілігіне берілген алтыншы ғимарат.

Ілкімді істің нәтижесінде кезекте тұрған жүзден астам отбасы қоныс тойын тойлады. Келесі жылы  иесіз қалған көп қабатты тағы үш үйді жөндеп, халықты баспанамен қамту жоспарда бар. 

Мына бес қабатты үй жиырма жылдан артық қаңырап бос тұрды десе, сене қою қиын. Жаңадан салынған үйден еш кем емес. Іші-сырты жарқырап тұр. Ұядай, жып-жылы. Осы үйді қалпына келтіруге республикалық бюджеттен 1 миллиард теңгеге  жуық қаржы бөлінген.

Еркебұлан Мыржықов, мердігер:

- Қысы-жазы аристон болер арқылы отырады, суы мұздай, жылу жүйесі бәрі түгел. Жарығы мен домофонына дейін қойып бердік. 100 пайыз дайын тұр. Ойын алаңын, асфальт, тас төсеуіштерін салдық. 

Жақын арада бұл үйге кезекте тұрған 60 отбасы қоныстанады. Мұның алдында биыл 48 пәтерлі көп қабатты үй пайдалануға берілді. Алайда соған қарамастан шағын шаһарда баспанаға сұраныс азаяр емес. Қазір 1600 адам пәтер кезегінде тұр. Қаланың жағдайы жақсарған сайын Арқалыққа көшіп келгісі келетіндер көбейген.

Қайырден Жиенбаев, Арқалық қаласының тұрғыны:

- 75 жыл осы жақта жүрмін ғой. Мен осы Арқалықты мынау көшеге шығып аралағанда тіпті кейде танымай қаламын өзім. Өйткені көп үйлер салынып жатыр. Көп мекеме салынып жатыр. Қаңырап, бос қалған бұл қала, қазір міне, қарасаңыз жол қандай, театр бар, мәдениет сарайы бар.

Мағауия Қалиев, тілші:

- Осы жылдың ішінде Арқалық қаласында қаңырап тұрған алты ғимарат қалпына келтірілді. Соның бірі – менің мынау ту сыртымдағы 30 жылдан астам есік терезесі үңірейіп, бос тұрған нысан. 3-4 айдың ішінде ине-жіптен өткендей жаңа кейіп енді. 

Тізбелеп айтсақ, тұрғын үйлерден тыс, спорт интернаты, күрес, бокс залдары салынды. Бастан-аяқ жөндеуден өткен бұрыңғы ескі кинотетр «Қазақстан» спорт кешеніне айналды. Тозып тұрған мәдениет сарайы қайта жаңғыртылды. Жауапты мамандар бұл жұмыс келесі жылы да жалғасады деп отыр.

Абылай Тұрғанов, Арқалық қаласының ТКШ бөлімінің басшысы:

- Алдағы уақытта 2026 жылға тағы да қаламызда тоғыз қабатты 108 пәтерлі үйді жоспарлап отырмыз. Оған 1 миллиард теңгедей ақшаға сұраныс сұрап отырмыз. Төрт қабатты бұрынғы «Достар» мейрамханасын халыққа үй қылып беруді жоспарлап отырмыз. Сосын Горбачева көшесінде үш қабатты үй бар. Оны да беретін ойымыз бар. 

Алдағы жылы осы үш көпқабатты үй жөнделіп, пайдалануға берілсе, 180 отбасы баспаналы болмақ. 

Авторлары: Мағауия Қалиев, Сергей Трахтенберг