Астана әуежайы 15 сәуірден бастап жұмыс режимін өзгертеді

Астана халықаралық әуежайы 2026 жылдың 15 сәуірі мен 31 мамыры аралығында ұшу-қону жолағында жоспарлы жөндеу жұмыстарын жүргізу туралы маңызды мәлімдеме жасады, деп хабарлайды Arasha.kz.

Әуежайдың хабарламасына сәйкес, көрсетілген кезеңде ұшу-қону жолағы күн сайын жергілікті уақыт бойынша сағат 10:00-ден 18:00-ге дейін уақытша жабылады.

«Жұмыстар жоспарлы сипатта болып табылады және аэродром инфрақұрылымы мен жарық беру жабдықтарын тиісті пайдалану күйінде ұстауға, сондай-ақ ұшу сенімділігі мен қауіпсіздігін арттыруға бағытталған», - деп хабарлады Астана халықаралық әуежайының баспасөз қызметі.

Одан әрі мынадай нақтылау берілген: жұмыс жүргізу кезеңінде көрсетілген уақыт аралығында орындалатын барлық тұрақты халықаралық және ішкі рейстер тәуліктің ерте немесе кешірек уақытына ауыстырылды.

Сондай-ақ, кестедегі барлық түзетулер әуе компанияларымен және уәкілетті мемлекеттік органдармен алдын ала келісілгені атап өтілді.

«Әуежай уақытша шектеулер кезеңінен тыс уақытта штаттық режимде жұмысын жалғастырады», - делінген хабарламада.