Астанада Болашақ прокурорлар клубы ашылды

Астанада тұңғыш рет Өтеген Сейітов атындағы «Болашақ прокурорлар клубы» ашылды.

Оған әр мектептен үздік оқушылар қабылданып, өскелең ұрпақ үшін өнегелі шаралар өткізіледі. 

“Болашақ прокурорлар” клубына Астананың Сарайшық ауданындағы 17 мектептен 17 оқушы қабылданды. Жоба мақсаты оқушылардың құқықтық сауаттылығын арттырып, олардың тәртіпті де тәрбиелі азамат ретінде қалыптасуына үлес қосу.

Бауыржан Асқаров, Сарайшық ауданы прокурорының орынбасары:

- Бүгінде прокуратура – қоғамда заң мен тәртіп идеологиясын ілгерілету жөніндегі 2025-2030 жылдарға арналған тұжырымдаманы іске асырудағы негізгі институттардың бірі. Жастармен жұмыс біздің басым бағыттарымыздың бірі. Сол себепті біз жаңа жобаны таныстырдық.

Жоба асында құқықтық сабақтар мен дебаттар, әлеуметтік акциялар мен экскурсиялар өткізіледі. Оқушылар сот отырыстарына қатысып, тергеу изоляторларына да барады. Осылайша прокурорлардың жұмысын көріп, мамандықтың қыр-сырымен танысады.       

Елдана Алпысбай, оқушы:

- Ең біріншіден, әйелдердің құқығын қорғағым келеді. Қазір осыған қатысты заң күшейіп жатыр. Бұл саланы дамытуға үлес қосқым келеді. Әйелдер мен балаларға көмектескім келеді. 

Қайырлы Жұмаханов, №112 мектеп директоры:

- Тәрбиені тал бесіктен, дейді қазақ. Темірдей тәртіп, заң үстемдігі деген қағидаларды оқушы кезден ұстану өте маңызды деп ойлаймын. Себебі оқушыларымызды шақырып, сұхбаттасу оқушыларға үлкен қолдау, мотивация береді. 

Прокурорлар мұндай оқыту әдісі оқушыларға оң әсерін тигізеді деп санайды. Қоғамда өзінің құқығын қорғап, өзгелерді құрметтей білетін жас буын қалыптастырмақ ниетте.  

Мерей Қанапия, Досбол Байділдин