Астанада дәрігерлер 20 жастағы жас ананың жатырын алып тастаған: тергеу басталды

Астанада 20 жастағы тұрғын босанғаннан кейін үйіне шығарылған. Бұл ретте оның дене қызуы болған. Туыстарының айтуынша, кейінірек оның жағдайы күрт нашарлап, ота жасау қажет болған. Жақындарының мәліметінше, ота барысында оның жатыры алып тасталған, - деп хабарлайды Tengrinews.kz.

Астанада 20 жастағы тұрғын босанғаннан кейін үйіне шығарылған. Бұл ретте оның дене қызуы болған. Туыстарының айтуынша, кейінірек оның жағдайы күрт нашарлап, ота жасау қажет болған. Жақындарының мәліметінше, ота барысында оның жатыры алып тасталған, - деп хабарлайды Tengrinews.kz.

Босанған әйелдің тағдыры туралы оның әпкесі Т. айтып берді. Ол отбасы асығыс қорытынды жасамайтынын, бірақ болған жайттың мән-жайын білгісі келетінін атап өтті. Оның сөзінше, 2005 жылы туған туысының жүктілігі қалыпты өткен.

"Тоғыз ай бойы ол дәрігерлердің бақылауында болып, сараптамалар тапсырды. Бізге бәрі жақсы екенін айтты. 27 наурызда ол 38 апталық мерзімде жоспарлы түрде ауруханаға жатқызылды. Сол күні кесар тілігі жасалды. Салмағы 2845 грамм ұл бала дүниеге келді", - дейді қыз.

Әпкесінің айтуынша, перзентхананың өзінде-ақ қауіпті белгілер байқалған. Алғашқы күндерден бастап әйелдің дене қызуы көтеріліп тұрған. Оған екпе салғанда жағдайы жеңілдегенімен, кейін қызуы қайта көтерілген.

"Бірнеше күннен кейін сіңлімді үйге шығарып жіберді. Бұл өзі күмәнді жағдай еді, өйткені оның дене қызуы тұрақсыз болатын. Үйге келген соң жағдайы күрт нашарлады. Таңға жуық денесі дірілдеп, қызуы қатты көтерілді. Біз бірден жедел жәрдем шақырдық", - деп еске алады әпкесі.

Пациент шұғыл түрде қалалық ауруханаға жеткізілген. Онда, туыстарының айтуынша, оның жағдайына қатысты түрлі болжамдар қарастырылған.

"Басында бір диагноз, кейін басқасы деді, қабыну, инфекция деп айтты. Ұзақ консилиум жүріп, шешім бірнеше сағат бойы қабылданды. 2 сәуірде оған шұғыл ота жасалды. Бізге отаның сәтті өткенін және жағдайы тұрақталғанын хабарлады", - дейді Т.

Алайда, кейінірек отбасы отаның ауыр салдары туралы білген.

"Консилиум жүріп жатқанда бізге жатырды алып тастау мүмкіндігі туралы айтқан болатын. Отадан кейін мен бұл туралы сұрадым. Алдымен жоқ деді. Кейін басқа дәрігер жатырдың алып тасталғанын растады. Бұл біз үшін үлкен соққы болды", - деп бөлісті ол.

Отадан кейін пациент жансақтау бөлімінде жатқан, қазір палатаға ауыстырылды. Оның отбасы болған жағдай туралы әлеуметтік желілерде жазып, мұқият тергеуді сұрап отыр.

Астана қаласының перинаталдық орталығы бұл жағдай бойынша қызметтік тергеу жүріп жатқанын хабарлады. Бұл ақпаратты қалалық денсаулық сақтау басқармасы да растады.

"Әлеуметтік желілерде жарияланған деректер бойынша тәуелсіз мамандарды тарта отырып, қызметтік тергеу жүргізіліп жатыр. Пациентке тегін медициналық көмектің кепілдік берілген көлемі аясында білікті медициналық көмек көрсетілді. Емдеу нәтижелері бойынша ол әрі қарай бақылауда болу ұсыныстарымен қанағаттанарлық жағдайда үйіне шығарылды. Пациентпен тұрақты байланыс орнатылған. Тексеру қорытындысы бойынша барлық мән-жайға объективті баға берілетін болады", - деп хабарлады медициналық ұйымнан.

Медициналық мекеме тексеру аяқталғанға дейін асығыс қорытынды жасамауға шақырды.