Астанада Еңбек пен ерлік дастаны әдеби байқауының жеңімпаздары марапатталды

Елордада жұмысшы мамандықтарын ұлықтауға арналған «Еңбек пен Ерлік дастаны» республикалық әдеби байқауы қорытындыланды.

Шараны биылғы «Жұмысшы мамандықтар жылы» аясында Мәдениет және ақпарат министрлігі ұйымдастырған. Оның мақсаты – қарапайым еңбек адамдарының өз ісіне деген адалдығы мен сүйіспеншілігін, әр мамандықтың ерекшелігін насихаттайтын туындылардың жазылуына ықпал ету. Байқауға 50-ге тарта өтінім келіп түскен. 

Байқауға түскен тағылымы мол туындыларда еңбек адамдарының ішкі жан дүниесі, басынан кешкендері, армандары мен күнделікті кездесетін қиындықтары көркем кестеленген. Қазылар алқасының шешімімен, Бас жүлдені «Маңдай тер» поэмасы үшін белгілі ақын Ғалым Жайлыбай иеленді. 

Ғалым Жайлыбай, ақын, жеңімпаз:

- Еңбек адамдарын кейіпкер етіп, оларды насихаттау мақсатында «Ерлік пен еңбек дастаны» деген әдебиеттің түрлі жанрларында, поэзияда, проза жанрлары бойынша конкурс жариялаған болатын. Менің «Маңдай тер» деген поэмасының кейіпкері сонау Жезқазған мыс зауытының балқытушысы Тілеубаев Жұмабай деген азамат 33 жыл бойы сол пештің аузында 1650 градуста еңбек етеді. Қайнаған от пен жалынның ішінде еңбек етеді. Маңдай тері тамшылау деген бер жағы, кәдімгі от жалынмен еңбек ететін үлкен азамат екен.

Екінші орын қос бірдей қаламгерге бұйырды. Солардың бірі – «Біздің қаланың қаһармандары» шығармасын жазған Аслан Біржанұлы болса, екіншісі – «Күй» романының авторы Әйгерім Оспанова. «Болашақ» бағдарламасының түлегі бұл туындының жарық көруіне туған жерге деген сағыныш себеп болғанын айтады.

Әйгерім Оспанова, жүлдегер:

- Мен «Болашақ» бағдарламасымен Италияда оқып жүрген кезде еліме деген сағыныштан туған туынды деп айтсам болады. Жалпы байқау жарияланғанға дейінгі жазылған жүрекалды туындым. Жұмысшы мамандықтар жылы болғандықтан Еңбек адамдарына арналған «Еңбек пен ерлік дастаны» әдеби байқауының идеологиясымен үндескеннен кейін байқауға беруге бел будым.

Ал үшінші орынды Нұртас Тұрғанбектің «Соңғы кірпіш», Ерден Нұрахметтің «Қаланың соңғы сыпырушысы», Ділдәр Мамырбаеваның «Етікші» шығармалары мен Ақылбек Шаяхметтің «Еңбек – адам көркі» пьесасы алды.

Ерден Нұрахмет, жазушы:

- Осы байқауда аула тазалайтын мамандардың еңбегін бағалап, риза боламын. Қаламыздың тазалығы, жер бетінің тазалығы сол кісілердің еңбегі. Соған орай «Қаланың соңғы сыпырушысы» деген әңгіме жазған болатынбыз. Байқауда жүлделі 3-орынды алып отыр.

Салтанатты кеш соңында жеңімпаздарға дипломдар мен қаржылай сыйлықтар табысталды. Үздік шығармалар алдағы уақытта жеке жинақ болып басылып шығып, оқырманға жол тартпақ.

Авторы: Серік Селеубайұлы