Астанада Н. Айтұлының мерейтойына орай мүшәйра өтті

Мемлекеттік сыйлықтың лауреаты, Қазақстанның еңбек сіңірген қайраткері Несіпбек Айтұлының 75 жылдық мерейтойына орай мүшәйра өтті, деп хабарлайды 24KZ. Жыр додасы ақынды көзі тірісінде атағандай «Бостандық жырының бозжорғасы» деп аталды. Жүзден аса жазба ақын ой жүйріктігі мен сөз зергерлігін сарапқа салды. Жолданған шығармалар бұған дейін еш жерде жарияланбаған және басқа әдеби байқауларға қатыспаған болуы тиіс.

Несіпбек Айтұлы айтулы, арқалы ақын. Ел тәуелсіздігінің жаршысы әрі жыршысына айналған шалқыма шабытты шайыр. Ол көзі тірісінде үздіксіз мүшәйра өткізіп, қалам ұстаған қауымға қанат бітіретін. Алаш жұртын, азаттық рухын өлеңмен асқақтатуға атсалысқан. Ақынның өзі кетсе де, сол сара жолдағы ізі қалды. Енді дүбірлі доданы жыр ауылындағы жолдастары жалғап жатыр.

Дәулеткерей Кәпұлы, Қазақстанның еңбек сіңірген қайраткері, Халықаралық «Алаш» әдеби сыйлығының иегері:

- Ақындар өте белсенді. Өйткені Несіпбек Айтұлы қазақ өнеріне соншама еңбек сіңірген. Сол Нес ағаңның ақындық болмысын ашуға ақындар тілдік мәйегін, қорын қолданды. Бұл мүшәйраға келіп түскен барша өлең түбінде Несіпбек Айтұлына арналған жеке жинақ шығады ғой деп ойлаймыз.

«Өлеңге әркімнің-ақ бар таласы». Шығармашылық жаспен шектелмейді. Шабыт бітсе, шалғайға шабады. Мүшәйраға жүзден аса ақын қатысты. Ерік білдіргендер еркін көсілді. Тек екі ереже бекіді. Алғашқысы – Несіпбек Айтұлына арнау. Кейінгісінде тақырып кеңістігіне кедергі келтірмеді. Серік Ақсұңқарұлы да замандас заңғарының додасына түскенін мәртебе санайды.

Серік Ақсұңқарұлы, ақын, қатысушы:

- Қазақ әдебиетінің классигі. Екеуіміз әдебиетке бірге келдік. Несіпбектің бізден айырмашылығы бұл қазақтың қара өлеңінің уызына қанған. Қазақ тілінің қасиетіне жарыған елден келді. Қазақ поэзиясында өзіндік өрнегі бар. 

Қабиден Қуанышбайұлы, ақын, қатысушы:

- Мен де сол қатарда өз өлеңімді ұсындым. Комиссия жүлдегер деп тауыпты, соған қуаныштымын. Мен Несіпбек Айтұлының болмысын, тағдырын, азаматтығын, қайраткерлігін, мінезін, поэзиядағы жанкештілігін бәрін жақыннан таныдым. Сондықтан арнау жазу мен үшін қиын болған жоқ, жүректен төгіліп түсті. Сол себепті өлеңімнің жүлдеге лайық деп есептелгеніне қуаныштымын.

Сонымен жүзден аса ақындар ішінде 15-інің асығы алшысынан түсті. Екі бас жүлде, екі бірінші орын берілді. Ынталандыру да бар. Несіпбек Айтұлы мұндай мұра қалдырмаса, алты алаш оның асыл қазынасын бұлайша ардақтап, оның руханиятқа жасаған еңбегін осынша жоғары бағаламас еді. Қазылар алқасының қазықты ойы осы болды.

Авторлары: Нысаналы Ығыл, Ержан Қанапияұлы