Астанада заманауи әдебиеттанудың теориялық мәселелеріне арналған халықаралық конференция өтті

Халықаралық деңгейде ұйымдастырылған жиынның мақсаты – заманауи әдебиеттану ғылымының өзекті теориялық мәселелерін талқылау, структуралистік және феноменологиялық бағыттағы зерттеулерді жүйелеу, сондай-ақ ғалымның ғылыми және шығармашылық мұрасын жан-жақты зерделеу болды.

Іс-шара барысында мерейтой иесіне арналған бейнебаян көрсетіліп, ғылыми еңбектерінің библиографиясы мен конференция материалдары жинағы таныстырылды. Сонымен қатар жаңа кітаптардың тұсаукесері өтті. 

Пленарлық мәжілісті Мәжіліс депутаты, филология ғылымының докторы, профессор Аманжол Әлтай жүргізді. Алқалы жиында Мәулен Әшімбаев, Ерлан Қошанов, Ерлан Қарин, Саясат Нұрбек және өзге де мемлекеттік органдардың, ғылыми-зерттеу институттарының, жоғары оқу орындарының басшылары мен мәдениет және білім саласының жетекші өкілдерінің құттықтау сөздері оқылды. Сондай-ақ аталған отырыста отандық және шетелдік жетекші ғалымдардың баяндамалары тыңдалып, әдебиеттанудың қазіргі бағыттары, поэтика, ұлттық әдеби үдеріс және пәнаралық зерттеулер мәселелері кеңінен талқыланды.

Жиын барысында белгілі ғалым Шәкір Ибраев сөз сөйлеп, мерейтой иесінің ғылыми еңбектеріне жоғары баға берді. Оның айтуынша, мифтің мазмұны қазіргі адам санасының терең қабаттарымен астасып, тек әлеуметтік астармен шектелмей, адам болмысының құндылықтық, рухани қырларын да қамтиды.

– Миф – жай қайталанатын дайын мотив емес. Ол – ақынның ойы мен сезім дүниесінің жаңа өрісін ашатын, сырлы әлемге айналған күрделі құбылыс. Қазіргі әдебиетте миф феноменологиялық тұрғыдан жаңаша трансформацияға түсіп, адам танымының терең қатпарларын айқындайды. Бұл үдеріс Жанат Әскербекқызының ғылыми ізденісі мен көркем шығармашылығында айқын көрініс табады, - деді ғалым.

Сонымен қатар ол әдеби-көркем шығармалардағы миф пен психологиялық құбылыстардың өзара байланысына тоқталып, сыртқы құрылымы мифке ұқсас болғанымен, олардың мазмұны бүгінгі қоғам шындығын, заманауи адам болмысының ерекшеліктерін бейнелейтінін атап өтті.

Халықаралық ғылыми-практикалық конференцияға Қазақстан және шетел мемлекеттерінен келген ғалымдар, жоғары оқу орындарының оқытушылары, жас зерттеушілер және әдебиет саласының мамандары қатысып, ғылыми тәжірибе алмасуға, халықаралық ынтымақтастықты дамытуға және ұлттық әдебиеттанудың жаңа бағыттарын айқындауға мүмкіндік алды.

Бұған дейін ақын, қоғам қайраткері Зуқай Шәрбақынұлы өмірден өткенін хабарлаған едік.