Астанадағы өрт салдарынан көпбалалы отбасы үйсіз қалды

Астанада төрт бала тәрбиелеп отырған отбасы ірі өрт салдарынан баспанасыз қалды, –  деп хабарлайды Aikyn.kz сайты

 Astana арнасының дерегінше, өрт кезінде төрт бала үйде болған.  Өрт түн ортасында, балалар ұйқыда жатқанда тұтанған. Өртті алғаш баланың үлкені алты жасар ұл байқаған. Нәтижесінде балалар жалаңаш, жалаң аяқ күйде терезеден шығып үлгерген.

Зардап шеккен Айнұр Наниеваның айтуынша, өрт сөндірушілер келген үй толығымен өртеніп кеткен. Қазір олар туысының үйін паналап жүр. 

"Өрт пештің кесірінен шыққан болуы мүмкін. Пештен заттар өртене бастаған көрінеді. Бұл кезде бәрі ұйықтап жатқан. Салдарынан от лезде лап ете түсті. Өрт сөндірушілер келгенге дейін үй түгелдей дерлік жанып кетті. Біздің қазіргі басты проблемамыз – үйді қалпына келтіру. Жөндеу жұмыстарына қаражатымыз жоқ. Үй толығымен жанып кетті, ештеңе қалмады. Тіпті балалардың киімі де – күнделікті киетіні де, мектептікі де сақталмады. Бәрі өртенді. Балалар өртеніп жатқан үйден терезе арқылы жалаң аяқ және күртесіз қашып шықты", - дейді зардап шеккен Айнұр Наниева.

Астана қаласы ТЖД ресми өкілі Нұргүл Нұрғалиеваның сөзінше, өрт сөндіру бөлімшелері келген кезде барақ үйдiң шатыры, қазандық пен төрт қора-қопсы ішінара өртеніп жатқан.

- Өрттің жалпы аумағы 270 шаршы метрді құрады. Өртті сөндіру барысында өрт сөндірушілер 15 газ баллонын шығарды. Қаза тапқандар мен зардап шеккендер жоқ, - дейді ол.

Сондай-ақ жалын көрші үйдің шатырын да шарпыған. Зардап шеккендердің арасында зейнеткерлер мен мүгедектігі бар адамдар бар. Олар зақымданған баспананы өз бетінше қалпына келтіре алмайды. 

Астана қаласы әкімдігі бұл баспаналар жойылу керек болатын. 

"Керегетас көшесі, 46 мекенжайындағы үй 2027 жылы құлатылады деген жоспарлы тізімге енгізілген. Пәтер иелеріне бар баспананың орнына жаңа тұрғын үй беріледі. Әлеуметтік көмек көрсету аудан әкімдігі аппаратының құзыретіне кірмейді. Қазір  мектеп сөмкелері мен азық-түлік жиынтығы түрінде көмек көрсетілуі мүмкін", - деп хабарлады Астана қаласы әкімдігінің баспасөз қызметі өкілдері.