Аңсар Айдаров алдыңғы басшының шулы жұмыстан босатылуынан кейін Самұрық Энергоны басқарды

Аңсар Айдаров "Самұрық-Энерго" АҚ басқарма төрағасы болып тағайындалды. Оны тағайындау туралы шешімді "Самұрық-Қазына" АҚ басқармасы қабылдады, деп хабарлайды Tengrinews.kz.

Қордың басқарма төрағасы Нұрлан Жақыпов жаңа басшыны компания ұжымына таныстырып, жұмыс кеңесін өткізді. Кездесу барысында ол негізгі инвестициялық жобаларды іске асыру мерзімдерін қатаң сақтау және электр станцияларын уақтылы іске қосу қажет екенін мәлімдеді.

Аңсар Айдаров "Самұрық-Қазына" компаниялар тобында 2013 жылдан бері жұмыс істейді. Бұған дейін ол "Энергия Семиречья" ЖШС бас директоры, "Самұрық-Энерго" АҚ Жобалық кеңсесінің басшысы және инвестициялар жөніндегі бас директоры қызметтерін атқарған.

Еске салайық, 28 қазанда Қайрат Мақсұтов "Самұрық-Энерго" АҚ басқарма төрағасы қызметінен босатылған болатын. Үкімет бұл шешімді компанияның стратегиялық инвестициялық жобаларды жүзеге асыру қарқыны көңіл көншітпейтінімен, сондай-ақ, жаңа электр өндіру қуаттарын салу және пайдалануға беру мерзімдері сақталуын бақылау жеткіліксіздігімен байланысты деп түсіндірді.

Кейінірек премьер-министр Олжас Бектенов Мақсұтов жұмыстан босатылуына қатысты пікір білдірді. Ол жобалардың іске асырылуын бақылау жеткіліксіз екенін және олар уақтылы орындалуы үшін жауапкершілікті күшейту қажет екенін мәлімдеді.

Бізді Google-дың негізгі дереккөздер тізіміне қосыңыз