Демалыс күндері Қазақстанда қар жауып, тұман түседі

Қарашаның алғашқы күндері Қазақстанда жаңбыр, қар жауып, көктайғақ болады деп күтіледі. Бірқатар өңірде тұман түсіп, жел күшейеді және шаңды дауыл тұрады деп болжанады. Қазгидромет синоптиктері 31 қазан мен 2 қараша аралығында ауа райы қандай болатынын айтты, деп хабарлайды Tengrinews.kz.

Қазақстанның қай өңірлерінде қар жауып, көктайғақ болады?

Синоптиктердің болжамы бойынша, елдің басым бөлігінде құбылмалы ауа райы орнайды. Солтүстік-батыс циклонның және онымен байланысты атмосфералық фронттардың өтуіне байланысты жаңбыр мен қар түрінде жауын-шашын күтіледі.

Қазақстанның солтүстігі мен шығысында көктайғақ болады деп болжанады. Ал елдің батысы мен солтүстік-батысында айтарлықтай жауын-шашын күтілмейді - антициклонның әсерінен ауа райы тұрақты сақталады.

Республика бойынша жел күшейеді деп күтіледі. Күндіз Қазақстанның оңтүстігінде шаңды дауыл соғуы мүмкін.

Түнде және таңертең елдің солтүстігі мен шығысында, сондай-ақ оңтүстік пен оңтүстік-шығыстың таулы аймақтарында тұман түседі деп болжанады.

Синоптиктер жауын-шашын мен желдің күшеюіне қарамастан, Қазақстандағы температуралық фонда айтарлықтай өзгерістер болмайтынын айтты.

Бұған дейін синоптиктер Қазақстанда алдағы қыстың қандай болатынын айтқан еді. Алдын ала болжам бойынша, 2026–2027 жылдардың қысы салыстырмалы түрде жылы болады, алайда кейбір аймақтарда жауын-шашын мөлшері климаттық нормадан асуы мүмкін. Сондай-ақ синоптиктер температураның күрт өзгеруі, боран мен көктайғақ болатынын ескертті. Толық болжам осы жерден оқыңыз.

Бізді Google-дың негізгі дереккөздер тізіміне қосыңыз