Грин карта лотереясына тіркелу тағы да кейінге шегерілуі мүмкін

АҚШ-тың грин-картасын алуға ниеттілерге тағы күтуге тура келеді. АҚШ-тың тоғызыншы округтік апелляциялық соты DV-2027 лотереясына тіркеуді ашу туралы шешімнің күшін тоқтатты, сондықтан өтінім беру қашан басталатыны әзірге белгісіз, деп хабарлайды Tengri Travel.

Неге тіркеу тағы шегерілді?

Қаулы 29 қазанда шығарылды. Сот федералды үкіметтің апелляциясы қаралып жатқан кезде АҚШ Мемлекеттік департаментіне төменгі сатыдағы сот шешімін орындамауға уақытша рұқсат берді.

"Біз Мемлекеттік департаменттің лотереяға тіркеуді ашпау туралы шешімін құптамаймыз. Соған қарамастан, Red Eagle компаниясы өз мүдделерінің визалық лотерея туралы заңмен қорғалатынын және талап қоюға негізі бар екенін дәлелдей алмады", - делінген сот шешімінде.

Апелляциялық сатының пікірінше, компания DV-2027 бағдарламасының тоқтатылуы оның мүдделеріне тікелей әсер ететінін немесе нақты қаржылық шығын келтіретінін дәлелдемеген. Сондықтан сот Red Eagle компаниясының сот ісін жүргізуге заңды негіздері бар екеніне күмән келтірді.

Лотерея қашан ашылуы керек еді?

Бұған дейін Сан-Диегоның федералды судьясы Джинсук Охта Америка билігіне 29 қазанда тіркеудің басталғанын жариялауды, 1 қарашада өтінімдерді қабылдауды ашуды және 3 желтоқсанға дейін іріктелген қатысушыларға хабарлауды міндеттеген болатын.

Алайда апелляциялық соттың жаңа шешімі жағдайды өзгертті. Тіркеуді қайта бастау туралы қаулының орындалуы уақытша тоқтатылды.

Осылайша, DV-2027 бағдарламасына өтінім беру әзірге мүмкін емес. АҚШ Мемлекеттік департаменті тіркеудің басталу мерзімін әлі жариялаған жоқ.

Сот ісі туралы не белгілі?

Еске сала кетейік, 2026 жылғы 14 қазанда Сан-Диегоның федералды судьясы Джинсук Охта АҚШ Мемлекеттік департаментін DV-2027 бағдарламасын қайта бастауға міндеттеді.

Сотқа Red Eagle Law иммиграциялық заңгерлік компаниясы шағым түсірген. Ол тіркеу мерзімі бұған дейін 2026 жылдың күзіне жоспарланған лотереяны ашуды талап етті.

Сот шешімінен кейін федералды үкімет апелляциялық шағым берді. Енді бағдарламаны қайта бастау туралы қаулының орындалуы іс одан әрі қаралғанға дейін тоқтатылды.

Әзірге лотереяға қатысуға ниет білдірушілерге АҚШ Мемлекеттік департаментінің хабарландыруларын бақылауға тура келеді. Тіркеу өтінімдерді қабылдау ресми түрде ашылғаннан кейін ғана басталады.

Грин-карт деген не?

Грин-карт (Green Card) - АҚШ-тың тұрақты тұрғыны мәртебесін растайтын құжат. Оның иелері келесі құқықтарға ие болады:

АҚШ-та шектеусіз тұру және жұмыс істеу; әлеуметтік жеңілдіктер алу; кейін азаматтыққа өтініш беру.

Diversity Visa лотереясы жыл сайын өткізіледі. Оған АҚШ-қа иммиграция деңгейі салыстырмалы түрде төмен елдердің, соның ішінде Қазақстанның азаматтары қатыса алады.

Айта кетейік, DV-2026 ұтысы аяқталды, ал келесі DV-2027 ұтысының өткізілу күндері әзірге белгісіз.

Айта кетейік, былтыр 16 қыркүйектен бастап грин-карт лотереясына (Diversity Visa Lottery) қатысуға тіркелу ақылы болды. Енді сауалнама тапсыру үшін бір доллар төлеу қажет. Бұған дейін лотереяға қатысу толықтай тегін болатын.

Тағы оқыңыз: АҚШ 50 елдің азаматтарына 20 мың долларға дейін визалық кепіл енгізеді

Бізді Google-дың негізгі дереккөздер тізіміне қосыңыз

Қосу