Америка кинодағыдай деп ойладым . Қазақстандық АҚШ қа барып, елді басқа қырынан көрді

24 жастағы қазақстандық Бекмұхаммед Құсайынов АҚШ-қа алғаш рет барып, Голливуд фильмдері арқылы елестетіп үйренген елді көремін деп үміттенген еді. Бірақ зәулім ғимараттар мен жылтырақ бейненің орнына оны шағын қалалардың өзгеше тыныс-тіршілігі мен үндістер қауымдастығы аумағындағы қонақүйдегі жұмыс күтіп тұрды. Ол өз оқиғасын Tengri Life басылымына айтып берді.

Алматыдан - Le Cordon Bleu мектебі мен Америка асханасына дейін

Бекмұхаммед Құсайыновтың туған жері - Алматы. Ол 16 жасына дейін Қазақстанда тұрып, білім алған, кейін Малайзияға қоныс аударып, әйгілі Le Cordon Bleu кулинария мектебінің Culinary Arts бағдарламасына оқуға түскен.

Оқуын тәмамдаған соң, отандасымыз Sunway University-де білімін жалғастырып, кулинарлық менеджмент бойынша бакалавр дәрежесін иеленді.

Бекмұхаммед Құсайынов. Фотоны материал кейіпкері ұсынды

Жас шефтің тәжірибесінде әйгілі аспаз Гордон Рамзидің мейрамханасында және Малайзиядағы екі Michelin жұлдызына ие болған Dewakan жоғары деңгейлі асхана мейрамханасында өткен тағылымдамалар бар.

Қазақстанға оралғаннан кейін ол Алматының танымал орындарында су-шеф болып жұмыс істеп үлгерді. Алайда асқақ армандары оны алға жетеледі: LinkedIn арқылы бос жұмыс орнын тапқан Бекмұхаммед АҚШ-қа - Нью-Мексико штатындағы Похуаке пуэблосының аумағында орналасқан Hilton желісінің қонақүйіне аға аспаз (Chef de Partie) болып жұмысқа аттанды.

Анықтама: Похуаке пуэблосы ("су ішетін жердегі ағаш" деп аударылады) - АҚШ-тың Нью-Мексико штатындағы тева халқының тарихи үндіс қауымдастығы.

"Нағыз Америка осы ма?"

Америкамен таныстық Альбукерке қаласынан басталды - бұл қала көпшілікке "Во все тяжкие" және "Лучше звоните Солу" сериалдары арқылы таныс. Даунтаунға алғашқы шығуы жігіт үшін күтпеген жағдай болды: тап-таза көшелер мен дамыған инфрақұрылымның орнына ол үйсіздерді, асфальтта жатқан шприцтерді, өзіндік иісті және әлеуметтік құлдыраудың айқын белгілерін көрді.

"Мұнда мен өте көп үйсіздерді, тәуелділігі бар адамдарды, ластықты және әлеуметтік салақтықтың өте жоғары деңгейін көрдім: көшеде пайдаланылған шприцтер шашылып жатыр, марихуана иісі сезіледі, адам қалдықтарының іздері кездеседі. Әсіресе вокзалдар мен олардың айналасындағы үйсіздер көп шоғырланған аудандар қатты әсер етті", - деп еске алады ол.

Бекмұхаммед Құсайынов. Фотоны материал кейіпкері ұсынды

Қазақстандықтың бұған дейін тек жаңалықтардан немесе фильмдерден көрген дүниелері де болды.

"Мен АҚШ-қа алғаш рет келіп: "Фильмдерден көрген нағыз Америка осы ма?" деп ойладым. Бұған дейін мен АҚШ-ты негізінен экран арқылы қабылдап келдім және мұнда мұндай шынайы өмір болады деп мүлдем елестетпеппін", - дейді Бекмұхаммед.

Кинода көрсетілмейтін Америка

Бекмұхаммед шетелдік үшін ерекше жерге - Похуаке пуэблосының аумағына жұмыс істеуге кетті. Бұл жер АҚШ-тағы үндіс резервацияларына жататын аумақта орналасқан.

Мұндай аумақтардың бір-бірінен айырмашылығы бар екенін түсіну маңызды. Кейбір қауымдастықтарда табыс көзі жоқтың қасы, ал басқалары өз бизнесін дамытып, казинолар мен ауылшаруашылық кәсіпорындарын ашады. Сондықтан ол жерлердегі өмір сүру деңгейі де айтарлықтай өзгеше болуы мүмкін.

"Өте кедей резервациялар да, әлдеқайда ауқаттылары да бар - мысалы, мұнай өндіру, казино немесе басқа да табыс көздерінің арқасында. Біздің резервацияның негізгі табыс көзі - казино: мұнда екі ірі казино, сондай-ақ ірі ауылшаруашылық кәсіпорны орналасқан. Соның арқасында аумақ жақсы күтілген, айтарлықтай таза және қауіпсіз", - деп атап өтті ол.

Сонымен қатар жергілікті тұрғындардың күнделікті өмірі көп жағдайда Американың басқа елді мекендеріндегі үйреншікті өмірге ұқсайды. Адамдар жұмысқа барады, үйіне оралады, отбасымен уақыт өткізеді және әдеттегі істерімен айналысады.

Қазақстандық жергілікті халықтың әлеуметтік қолдау алу мүмкіндіктері бар екенін де айтты. Казино мен басқа да кәсіпорындардан түсетін табыс ішінара тайпа мүшелері арасында бөлінеді, баспанамен қамту және жұмысқа орналастыруға көмектесу бағдарламалары бар.

Нью-Мексикодағы Похуаке пуэблосы / Фотоны материал кейіпкері ұсынды

"Қай жерде көмек қажет болса, сонда жұмыс істеймін"

Қазір Бекмұхаммед Chef de Partie - аға аспаз лауазымында қызмет етеді. Классикалық мейрамхана жүйесінде мұндай маман асханадағы белгілі бір станцияға жауап береді. Бірақ іс жүзінде міндеттер өзгеруі мүмкін.

"Бізде жиі адам жетіспей жатады, сондықтан мен дәл қазір қай жерде көмек көбірек қажет болса, сонда жұмыс істеймін және командадағы олқылықтардың орнын толтыруға көмектесемін", - деді ол.

Фотоны материал кейіпкері ұсынды

Жұмыс күні станцияны ашудан, бақылау парақтарын тексеруден, тапсырыстардан және азық-түлікті дайындаудан басталады. Осыдан кейін команда шеф-аспаздармен кеңес өткізеді.

Әр апта сайын аспаздар арнайы тағамдар - specials әзірлейді. Бекмұхаммед оларды жасауға қатысады, кейін қонақтарға қызмет көрсету кезінде дайындайды.

Мейрамханадағы жұмыс көлемі / Фото материал кейіпкерінен

Бірақ жұмыс тек қонақүй жанындағы мейрамханамен шектелмейді. Мұнда тұрақты түрде үйлену тойлары, конференциялар мен ауқымды банкеттер өткізіліп тұрады.

"Жақында біз 2 мыңға жуық адамға арналған банкет дайындадық. Мәзір әзірлеп, өнімдердің мөлшерін есептеп, осыншама қонақты бір уақытта тамақтандыру үшін ас үй жұмысын ұйымдастыру қажет болды", - деді ол.

"Кейде өзімді ауылда жүргендей сезіндім"

АҚШ-та тұрған уақытында Бекмұхаммед ел ішінде көлікпен саяхаттап үлгерген. Американың оңтүстік-батысындағы кейбір жерлер оған күтпеген жерден Қазақстанды еске түсірген. Мысалы, Нью-Мексико, Аризона және Колорадо.

"Кейбір резервациялар арқылы өткенде, еріксіз қазақ ауылына тап болғандай күйде боласың. Сәулеті, жолдардың жағдайы және жалпы инфрақұрылымы ұқсас", - деп атап өтті ол.

Сонымен қатар Бекмұхаммед шағын елді мекендердің атмосферасы таныс болып көрінгенін баса айтты.

Резервацияға баратын жол / Фото материал кейіпкерінен

Саяхаттар оған АҚШ-ты үйреншікті түсініктерден тыс көруге көмектесті. Америка туралы сөз болғанда, көпшілік ең алдымен Нью-Йорк, Лос-Анджелес немесе Чикагоны - зәулім ғимараттарды, кең жолдарды, дамыған инфрақұрылым мен үлкен мүмкіндіктерді еске алады.

Бірақ мегаполистерден тыс жерде ел мүлдем басқаша көрінеді.

"Нью-Йорк, Чикаго немесе Лос-Анджелес сияқты ірі қалаларда тұратын адамдар өз аймағынан тыс жерлерге көп шыға бермейді. Көбісі бір елдің ішінде осындай мүлдем басқа шынайылық бар екенін елестете де алмайды", - дейді Бекмұхаммед.

Үй жылуынсыз өткен тоғыз жыл

Ерекше тәжірибеге, АҚШ-тың басқа қырымен танысуға және кәсіби жетістіктерге қарамастан, Бекмұхаммед үшін ең қиын сынақ үйреншікті емес ортада өмір сүру болмаған.

Қазақстан, Малайзия, енді міне АҚШ - жас аспаздың әртүрлі елдерде тұрып жатқанына тоғыз жылға жуықтады. Тұрақты көшіп-қону оның "үй" туралы түсінігін біртіндеп өзгерткен.

"Тоғыз жылдан бері әртүрлі елдерде тұрып келемін және ешбір жерді өз үйім деп толық сезіне алмаймын. Тіпті Қазақстанға оралғанда да, өзімнің өзгергенімді түсінемін, ол жақта да өзімді толықтай жат емес сезіну қиын. Бәлкім, дәл осы тұрақты үйдің жоқтығы бәрінен де қатты бататын шығар", - деп ағынан жарылды ол.

Тағы оқыңыз: Визасы болса да бортқа кіргізбейді: АҚШ-қа ұшатын жолаушылар үшін не өзгереді?

Бізді Google-дың негізгі дереккөздер тізіміне қосыңыз

Қосу