Астанадан Кутаисиге рейстер саны артады

АСТАНА, 6 сәуір – Sputnik. FlyArystan жазғы маусымда Астанадан Кутаисиге рейстер санын арттырады, деп хабарлады әуе компаниясы.

"Астана – Кутаиси – Астана" бағыты бойынша рейстер кестесіне өзгерістер енгізілді.

"1 маусым мен 31 тамыз аралығында рейстер аптасына екі рет – дүйсенбі және сәрсенбі күндері орындалады", - дейді компанияда.

Жазғы маусымда әуе компаниясы жолаушыларға Қазақстан астанасынан Батуми, Газипаша, Ташкент және Ыстықкөлге тікелей рейстер ұсынады.

Бұған дейін FlyArystan Грузияның тағы бір танымал туристік қаласы – Батуми бағыты бойынша рейстер жиілігінің артатынын хабарлаған болатын.

"Астанадан Батумиге тікелей рейстер 2 маусым мен 29 тамыз аралығында орындалады. Ал 25 маусымнан бастап рейстер жиілігі аптасына екіден үш ретке дейін ұлғайып, сейсенбі, бейсенбі және сенбі күндері орындалатын болады", - дейді әуе компаниясында.