Түркиядан Қазақстанға рейстер саны артады

Қазақстан мен Түркия екі ел арасындағы тұрақты әуе рейстерінің санын арттыру туралы келісті. Негізгі және туристік бағыттар бойынша рұқсат етілген рейстер саны аптасына 120-дан 224-ке дейін өседі, деп хабарлайды Tengri Travel.

Азаматтық авиация комитетінің мәліметінше, негізгі өзгерістер екі елдің ірі қалалары арасындағы рейстерге қатысты болмақ.

Ыстамбұлдан Астана, Алматы және Шымкентке, сондай-ақ Анкарадан Астана мен Алматыға орындалатын рейстердің рұқсат етілген саны аптасына 76-дан 138-ге дейін ұлғайтылды. Туристік бағыттар бойынша (Анталья мен Бодрумнан Қазақстан қалаларына) аптасына 44-тен 86 рейске дейін көбейтілді.

Нәтижесінде негізгі және туристік бағыттар бойынша жалпы лимит аптасына 120-дан 224 рейске дейін өсті.

"Қалған барлық бағытта екі тараптың әуекомпанияларына аптасына 14 рейске дейін орындау мүмкіндігі қарастырылған, бұл тікелей әуе қатынасын кеңейтуге және өңірлік байланысты дамытуға жағдай жасайды. Сондай-ақ үшінші елдерге тасымалдауды жүзеге асыру үшін "ауаның бесінші еркіндік дәрежесін" пайдалана отырып, екі тарап үшін 76-ға дейін жүк рейсін орындау туралы келісімге қол жеткізілді", - деп хабарлады ведомство.

Келіссөздер барысында тараптар азаматтық авиацияға қатысты басқа да мәселелерді талқылады. Атап айтқанда, ұшу қауіпсіздігі, авиациялық қауіпсіздік, авиациялық оқиғаларды тергеу, әуежайлардың жұмысы және саланы цифрландыру мәселелері сөз болды.

Бұған дейін түріктің SunExpress әуекомпаниясы Қазақстан мен Түркия арасында тұрақты жолаушылар рейстерін орындай бастайтыны белгілі болған еді. Жаңа шетелдік тасымалдаушы Қазақстанның авиатасымал нарығына 31 шілдеде шығып, Алматы - Измир бағыты бойынша тікелей әуе қатынасын ашты.

Google News арқылы жаңалықтарымызды қадағалаңыз