Атырау облысында жас жігіттер полицейге шабуыл жасалды: екі қызметкер зардап шекті

Атырау облысының Мақат ауданында бір топ жігіт қызметтік міндетін атқарып жүрген полиция қызметкерлеріне күш қолданған, – деп хабарлайды Aikyn.kz сайты.

Оқиғаның видеосы әлеуметтік желілерде тарап кетті.

Өңірлік полиция департаментінің мәліметінше, оқиға 3 сәуір күні шамамен сағат 22:00-де болған. Құқық бұзушылықтың алдын алу барысында бір топ азамат полиция қызметкерлеріне қарсылық танытып, күш қолданған.

Салдарынан екі полиция қызметкері зардап шекті.

Полицияның хабарлауынша, оқиғаға қатысқан барлық азаматтар анықталып, оларға қатысты тиісті процессуалдық шаралар қабылданған. Аталған дерек бойынша «билік өкіліне қатысты қорқыту немесе күш қолдану» бабымен қылмыстық іс тіркеліп, сотқа дейінгі тергеу амалдары жүргізілуде.

Құзырлы орган полиция қызметкерлеріне қарсы кез келген заңсыз әрекет жауапкершілікке әкеп соғатынын ескертті. Тергеу мүддесіне байланысты өзге мәліметтер жарияланбайды.