​Шибөрі шабуылы: Атырау облысында үш адам зардап шекті

27 қазан күні түнде Құрманғазы ауданы Бірлік ауылында шибөрі адамдарға  шабуыл жасаған. 

- Түнде, сағат 21.15 шамасында ит үргесін жолдасым екеуміз далаға шықтық. Жолдасым қора жақтағы малды байырқайын деп асығыс кетіп қалды. Мен тыста тұрғам, қайдан шыққанын білмеймін, шибөрі шыға келіп, маған ұмтылды. Аяғымды тістелеп, қолыммен қорғанбақ болғанымда, оны да жарақаттап тастады. Менің айқайымнан үйден қызым шықты. Бәрі жүгіріп келгенде, әлгі шибөрі бой тасалап қашып кетті. Егер олар болмағанда, мені талап тастар еді, арты неге соқтырары белгісіз. Біз ауылдың шет жағында тұрамыз,-дейді 59 жасар Өсер Сүлейменова. 

Жәбірленуші сағат 22.00-де жедел жәрдеммен аудандық ауруханаға жеткізіліп, вакцинация салынған. Сол күні кешке, шамамен сағат 19:30 бен 20:00 аралығында В. Григорьев көшесінің маңында шибөрі екі тұрғынға шабуыл жасаған. Жыртқыш Қайырбек Салахиденов пен Бауыржан Өтеғалиевті жерге құлатып, қолдарынан тістеп алған, кейін көзден таса болған. Зардап шеккен екі ер адам ауруханаға жүгініп, оларға қажетті екпелер мен медициналық көмек 

Ауыл адамдары соңғы кезде шибөрілердің көбейіп кеткенін түнде түрлі даусынан біледі екен. Жалпы ауылдарда бұралқы иттер де көбейіп кеткен. Ал округ әкімшілігі жабайы жыртқыш жануарларды атуға құзыреттері жоқ екенін айтуда. 

Ауыл тұрғындары заңнамаға түзету енгізгенін қалап отыр. Өйтпейінше ит те, шибөрі де көбейіп қаптап барады. 

"АЖ" анықтамасы: 

Шибөрі - ит тұқымдасына жататын жыртқыш аң. Дене тұрқы 71-82 см, бойы 45-50 см, салмағы 7-13 кг. Пішіні қасқырға ұқсас, бірақ одан екі есе кіші, түсі жирен сұрғылт болып келеді. Шибөрі тоғайда, қамысты жерде мекендейді, күндіз үңгірлерде, ағаш бұтақтарының арасындағы жапырақтар астына жасырынып, қорегін түнде іздеп шығады. Қаңтардың ортасынан ақпанның аяғында дейін ұйығып, 4-6,  кейде 8 күшік туады. Өмір сүру ұзақтығы 12-14 жыл.

Ләззат ҚАРАЖАНОВА

Бүгін, 16:40