Маңғыстау облысында болған атыстан екі адам зардап шекті

Ақтау тұрғындары 9 шілде күні таңертең Ақшұқыр ауылындағы автожуу кешені маңында болған атыс туралы ақпарат пен зардап шеккендердің фотосуреттерін әлеуметтік желілер мен WhatsApp мессенджерінде кеңінен таратуда.

Алдын ала мәлімет бойынша, оқиға салдарынан екі ер адам жарақат алып, Маңғыстау облыстық ауруханасына жатқызылған.

Зардап шеккендер туралы ақпаратты Маңғыстау облыстық ауруханасының баспасөз қызметі растады.

Медициналық мекеменің мәліметінше, қазіргі уақытта облыстық ауруханада Ақшұқыр ауылындағы оқиғадан зардап шеккен екі науқас ем қабылдап жатыр.

2001 жылы туған азамат №1 хирургия бөлімшесіне жатқызылған. Дәрігерлер оған беті, мойны және екі қолының бытырадан алған бірнеше оқ жарақатын, кеуде қуысының оң жақ бөлігін тесіп өткен оқ жарақатын және оң жақ жарақаттық гемоторакс диагнозын қойған.

Ал 1999 жылы туған екінші науқас №2 хирургия бөлімінде ем қабылдауда. Оған оң жақ сирағының ортаңғы бөлігіндегі бытырадан болған оқ жарақаты және бет сүйектерінің сыну диагнозы қойылған.

Дәрігерлердің айтуынша, екі науқастың да жағдайы тұрақты бақылауда. Оларға қажетті медициналық көмек толық көлемде көрсетіліп жатыр.

Әзірге Маңғыстау облысы полиция департаменті бұл оқиғаға қатысты ресми түсініктеме берген жоқ.