Павлодар облысында дауылдан екі әйел зардап шекті

Павлодар облыстық жедел жәрдем стансасы 26 сәуір күні екпінді желдің салдарынан екі жазатайым оқиға тіркелгенін хабарлады. Алғашқы шақырту Ақтоғай ауылынан түскен. 41 жастағы әйелдің басына шифер бөлігі құлаған.

— Емделуші Ақтоғай аудандық ауруханасына сағат 15:30–да беттегі тілік жарақатымен түсті. Ауруханаға түскен кездегі жағдайы орташа ауырлық дәрежесінде болды. Алғашқы медициналық көмек көрсетіліп, жағдайы тұрақтандырылды, — деп атап өтті облыстық денсаулық сақтау басқармасынан.

Ал Павлодар қаласында ағаштан үлкен бұтақ құлап, 34 жастағы әйел зардап шеккен. Әйелде жабық бас-сүйек жарақаты, мидың шайқалуы және маңдай тұсының қатты соққы алғаны анықталған.

Посмотреть эту публикацию в Instagram

Публикация от Александр (@pavlodar_budni)

Өңірлік төтенше жағдайлар департаменті 26 сәуір күні Павлодар облысының алты ауданында шатырлардың ұшуы бойынша 29 жағдай тіркелгенін мәлімдеді. Желдің екпіні секундына 28 метрге дейін жеткен. Көпқабатты және жеке тұрғын үйлерде, білім беру және денсаулық сақтау мекемелерінде, әкімшілік ғимараттар мен сауда нысандарында шатырлар зақымданған.

— 36 елді мекенде электр энергиясының өшуі тіркелді. Қазіргі уақытта облыстың 14 елді мекенінде 1009 абонент жарықсыз қалып отыр. Жөндеу-қалпына келтіру жұмыстары жүргізіліп жатыр. Қазіргі сәтте барлық жедел және коммуналдық қызметтер дауыл салдарын жоюды және зақымдалған инфрақұрылымды қалпына келтіруді жалғастырады, — деп хабарлады өңірлік төтенше жағдайлар департаментінен.

Посмотреть эту публикацию в Instagram

Публикация от Александр (@pavlodar_budni)

Еске сала кетейік, наурыз айының басында дауыл салдарынан Павлодар өңірінде 33 ғимараттың шатыры зақымданған.