Атырау онкоорталығында сәулелік терапия аппараты істен шықты

Соның салдарынан Атырау облыстық онкология орталығында радиологиялық бөлімнің пациенттерін емдеу курсы уақытша тоқтатылды.

«… Емнің қалған күндерін ала алмай отырмыз. Қашанға дейін күтеміз? Дәрігерлер мен медбикелерге ешқандай шағымымыз жоқ — олар пациенттерді қолдап, қолдан келгеннің бәрін жасауда. Бірақ аппаратты мүмкіндігінше тезірек жөндеу қажет, сонда адамдар емін жалғастыра алады», — деп онкопациенттер әлеуметтік желілерде жазып жатыр.

«Ак Жайық» онкоорталығының мәліметінше, жабдыққа диагностика жасалып, қажетті қосалқы бөлшектерге тапсырыс берілген. Жөндеу жұмыстарына Семейден маман шақырылды. Аппаратты қалпына келтіру сәуір айында жүргізіліп, мамырда іске қосу жоспарланып отыр.

Орталықтың баспасөз қызметі хабарлағандай, науқастарды уақытша Ақтауға немесе басқа қалаларға жіберу қарастырылған. Емдеу тегін жүргізіледі, жол шығындары өтеледі. 

Алайда бұл өтемақы тек сапардан кейін билеттер ұсынылған жағдайда беріледі. Ал туыстардың тұруы мен тамағына кететін шығынды отбасы өзі көтереді.

Айта кетейік, онкоорталықтың жаңа радиологиялық корпусының құрылысы әлі аяқталмаған. Онда заманауи сәулелік терапия аппараты орнатылуы тиіс еді, бірақ нысанның пайдалануға берілуі 2025 жылдың желтоқсанынан бері кейінге қалдырылып келеді.

Анастасия ШЕРСТЯНКИНА

Бүгін, 15:41