​Атырауда мектеп директорлары басқарудың жаңа тәсілдерін үйренді

Атыраудағы №48 мектепте облыс бойынша 150-ге жуық білім беру бөлімінің басшылары мен мектеп директорлары үшін оқыту тренингтері өтті, - деп хабарлайды Өңірлік коммуникациялар қызметі.

Іс-шараны «El Umiti» корпоративтік қоры Атырау облысы әкімдігінің Білім басқармасының қолдауымен ұйымдастырды.Жиынның мақсаты – мектеп басшыларының заманауи басқару, командалық жұмыс және оқушылардың қабілетін дамыту бағытындағы жұмыстарын арттыру. Бағдарлама аясында «El Umiti» қорының жобалары таныстырылып, «Мың бала» ұлттық олимпиадасының жеңімпаздарымен кездесті. 

Сондай-ақ «Smart Ustaz» және «Qabilet» жобалары аясында тренингтер өтіп, айтыс өнеріне арналған тәжірибелік сабақтар ұйымдастырылды.

⁃ 2019 жылы құрылған «El Umiti» қоры бүгінде Қазақстан бойынша 1 миллионнан астам қатысушыны қамтып, бірнеше әлеуметтік-білім беру жобасын жүзеге асырып келеді. Мәселен «Qabilet» жобасы облыста 2021 жылдан бері іске асырылып келеді. Осы уақыт ішінде 160-тан астам педагог арнайы семинарлардан өтті, ал «Дарын» орталығы базасында ашылған кабинетте 1 688 оқушы қабілеттерін анықтау тестінен өтті, - деді «El Umiti» қорының атқарушы директоры Гүлім Жүсіпова.

Одан бөлек өңір ұстаздарының кәсіби біліктілігін арттыруға бағытталған «Smart Ustaz» жобасы да қарқынды дамуда. Қазір 245 педагог онлайн платформада тіркелген. Биыл «Мың бала» ұлттық олимпиадасына Атырау облысының ауыл мектептерінен 1 700-ден астам оқушы қатысты.

Бүгін, 16:37