Атырауда ұлын алты рет пышақтаған әкесі колониядан құтылды

Томарлы ауылындағы бір үйде отбасылық драма орын алды.

56 жастағы ауыл тұрғыны туған ұлына қасақана ауыр дене жарақатын келтіргені үшін айыпталып, сот алдында жауап берді.

Іс материалдарына сәйкес, 11 сәуір кешінде әке мен бала бірге ішімдік ішкен. Кейін олардың арасында жанжал шыққан.

Тергеу нұсқасы бойынша, ұлы ұйықтап жатқан әкесіне бірінші болып тап беріп, оны тұншықтыра бастаған. Ер адам босап шығып, асүйден пышақ алып, бірнеше рет пышақ салған.

Сот-медициналық сараптама қорытындысына сай, жәбірленуші ішіне бір, арқасына бес пышақ жарақатын алған. Бауыр, ішек және қабырғалары зақымданған. Бұл жарақаттар ауыр дене жарақаты деп танылды.

Сотта айыпталушы кінәсін толық мойындады. Ол болған оқиғадан кейін ұлымен татуласқанын айтып, бостандықта қалдыруды сұрады.

Жәбірленуші де жанжалды бірінші болып өзі бастағанын растады және әкесіне жеңіл жаза тағайындауды өтінді.

Жаза тағайындау кезінде сот айыпталушының өкінішін, тараптардың татуласуын және жанжалға жәбірленушінің әрекеті себеп болғанын ескерді. Ал алкогольдік мас күйі ауырлататын жағдай ретінде танылды.

Нәтижесінде ер адам үш жылға шартты түрде бас бостандығынан айырылып, пробациялық бақылауға алынды. Үкім жарияланған соң ол сот залында қамаудан босатылды.

Анастасия ШЕРСТЯНКИНА

Бүгін, 13:06