Атырауда Яна Легкодимованың ісі бойынша үкім жарияланды

Бүгін Атырау облысы қылмыстық істер жөніндегі мамандандырылған ауданаралық сотының судьясы Зарема Хамидуллина 23 жастағы Яна Легкодимованы өлтіруге қатысты іс бойынша үкім шығарды. Бұл оқиға он бір ай бойы бүкіл Қазақстанды күйзеліске ұшыратты. Процесті тек Атырауда ғана емес, бүкіл елде бақылап отырды: шімірікпестен қатыгездікпен жасалған қылмыс жаға ұстатты.

Сотталушылар орындығында Ганюшкино ауылының екі тұрғыны — 24 жастағы Ризуан Қайыржанов пен 25 жастағы Алтынбек Қатимов отырды. Біріншісі негізгі айыпталушы ретінде, екіншісі сыбайлас ретінде қаралды.

Отырыстар барысында сот олардың жазысқан хаттарын зерттеді. Хабарламалардан шабуылдың түрлі жиырма нұсқасын талқылағандары көрінеді. Янаға қатысты қорлайтын сөздер айтылған. Осындай талқылаулардан кейін олар күнделікті тіршілік жайына көшкен: масаңдықтан кейінгі жайсыздыққа шағымданып, ұсақ-түйек істерін әңгімелеген. Мұның бәрі оларда адам өміріне деген құрмет пен жанашырлық мүлде жоғалғандай әсер қалдырды.

Процесс барысында айыптау бабы өзгертілді. Соңғы редакцияда сотталушыларға ҚР ҚК 99-бабы 2-бөлігінің 7 және 8-тармақтары («Топ болып алдын ала сөз байласып және тапсырыс бойынша жасалған адам өлтіру», аса ауыр қылмыс) және ҚР ҚК 202-бабы 2-бөлігі («Топ болып алдын ала сөз байласып бөтен мүлікті қасақана жою», ауыр қылмыс) тағылды.

Үкім

Сот Ризуан Қайыржанов пен Алтынбек Қатимовты жазасын ерекше қауіпсіздікпен қамтамасыз етілген мекемеде өмір бойына бас бостандығынан айыруға үкім етті.

Сонымен қатар, сот марқұмның анасының азаматтық талабын қанағаттандырды: әр айыпталушыдан моральдық зиян ретінде 15 миллион теңге және материалдық зиян ретінде 1 миллион 700 мың теңге өндірілді.

Үкім 15 күн ішінде апелляциялық тәртіппен шағымдануы мүмкін.

Ананың сөздері

«Ақ Жайық» тілшісі Яна жоғалған күннен бастап Галина Легкодимоваға хабарласып отырды.

Үкім қарсаңында, оған қиын болған әңгімеде ол: ««Қандай үкім шықса да, мен үшін жеңіс жоқ. Мен қызымнан айырылдым… бұл ауыртпалық енді өмірімнің бір бөлігіне айналды» деді.

Бұл сөздер, бәлкім, осы қайғылы оқиғаның ең терең мәнін дәл жеткізетін секілді.

Үш отбасы бұл оқиғаның түрлі жағында қалды, әрқайсысы өз қайғысын кешіп жатыр.

Бірақ ең ауыр сынақ Янаның анасына түсті. Мұндай қасіреттің мерзімі жоқ, ол өмір бойы жүректе қалады.

«Ақ Жайық» редакциясы Галина Легкодимоваға шын жүректен қолдау білдіріп, оның қайсарлығына құрмет білдіреді.

Бүгін, 13:32