Атыраудағы түнгі рейд: жастарды ойын клубтарынан әскери комиссариатқа алып кетті

Атыраудағы түнгі рейдтерден кейін әскери комиссариатқа жеткізілген жастардың бір бөлігі Привокзальный ықшамауданындағы әскери бөлімге жіберілген. Ата-аналардың айтуынша бұл жағдай әскер қатарына шақырылғандар мен олардың туыстарының қарсылығына қарамастан жасалған.

— Сөйтіп 23 жастағы балаларымызды алып кетті. Ұзақ уақыт қарсыласқанымызға қарамастан бәрібір әкетті. Көшеде ұстап алып, ата-анасына хабарламай әкетуі мүмкін екені әлі миымызға қонбай тұр. Біз тек келесі күні білдік. Тек аман-есен оралса екен деп тілейміз, — дейді олар «Ақ Жайыққа» берген пікірінде.

Түнде ұсталғаннан кейін әскери комиссариатқа жеткізілген жастардың туыстары прокуратураға жүгінбек болғанымен, түнде ешкімді таппаған және түсініктеме ала алмаған.

Келесі күні жігіттерді медициналық комиссиядан өткізіп, әскерге жөнелту рәсімін бастап, шаштарын қырып алып тастаған. Осыдан кейін олар әскери бөлімге жіберілген.

Еске салсақ, 27-28 сәуірге қараған түні қорғаныс департаменті мен полиция бірнеше ойын клубында рейд жүргізген. Куәгерлердің айтуынша, оларды ешқандай түсініктемесіз алып кеткен, ал кейбірі қарсылық білдіргенімен бәрібір әкетілген.

Бұл жағдай туыстардың ғана емес, заң тұрғысынан да сұрақтар туындатты. Ресми түрде мұндай шаралар «әскери есеп деректерін нақтылау» қажеттілігімен түсіндірілгенімен, жастарды ойын клубтарынан тікелей алып кету және олардың қозғалу еркіндігін шектеу қаншалықты заңды екені күмәнді болып отыр.

Сонымен қатар, телефондардың тәркіленуі де заңдылыққа қатысты сауал тудырды, себебі қолданыстағы заң бойынша азамат мүлкінен тек сот шешімі немесе қылмыстық іс аясындағы процессуалдық әрекеттер негізінде ғана айырылуы мүмкін.

Бұл жағдайға қатысты заңды негіздер көрсетілмеген.

Осы ақпарат жарияланған кезде Қазақстан Республикасының Қорғаныс министрлігі мен құқық қорғау органдарынан ресми түсініктеме түспеді.

«Ақ Жайық» редакциясы тиісті ведомстволарға ресми сауал жолдап, рейдтердің құқықтық негізін, азаматтарды әскери комиссариатқа жеткізу тәртібін және жеке заттарды тәркілеу мүмкіндігін түсіндіруді сұрады. Жауаптар қосымша жарияланатын болады.

Айгүл МАНСУРОВА

Бүгін, 12:31