Тергеу басталды: Қарағандыда дипломды енді қорғаған студенттерді әскери комиссариатқа алып кеткен

Фото: Ашық дереккөз

Қарағандылық Виктория Улиничтің айтуынша, оның інісі дипломын 23 мамыр күні қорғаған. Осыдан кейін студенттерге аудиториядан шығуға мүмкіндік берілмеген, себебі оларды әскери комиссариат қызметкерлері күтіп тұрған.

«Оларға таңғы сағат оннан кейін ғана шақыру қағаздарын табыстады. Ал қағазда таңғы тоғызда деректерді нақтылау үшін келуі керек екені көрсетілген», деді Виктория Улинич.

Осыдан кейін жастарды әскери комиссариатқа апарып, медициналық тексеруден өткізген. Қыздың айтуынша, оның інісінің бойын құжатта 1,88 метр деп көрсеткен, алайда шын мәнінде оның бойы 1,95 метр. Ол мұны бойы 1,90 метрден асатын әскери қызметкерлерге қосымша тамақтану қарастырылғанымен байланыстыруы мүмкін деп есептейді.

Қазақстанда әскери оқу орындарының үздік түлектеріне «аға лейтенант» атағы беріледі

Студенттерге оларды мерзімді әскери қызметке жіберу жоспарланып отырғаны айтылған. Алайда Викторияның інісі оқуын аяқтағанға дейін, яғни 1 шілдеге дейін кейінге қалдыру құқығы бар болған және одан кейін магистратураға түспек болған.

«Маған «ол дипломын қорғап қойды, демек оқуын аяқтады» деп жауап берді», деді ол.

Сондай-ақ ол әскери комиссариат қызметкерлері студенттің «дипломын кейін де алып үлгеретінін» айтқанын, ал ведомство өкілдерінің бірі құжатты үйіне өзі апарып беруге уәде еткенін мәлімдеді. Айтуынша, оның інісі дипломдық жобаны таныстыру үшін пайдаланған қымбат жабдықтарын тапсырып үлгермеген. Оның інісі Саран қаласында тіркелген және сол жердегі әскери комиссариатқа бекітілген. Соған қарамастан оны басқа студенттермен бірге Қарағанды қаласына алып кеткен, олардың арасында өзге қалалардан келген студенттер де болған.

Елімізде әскерге бару жасы 50-ге дейін ұзартылуы мүмкін

Оқиғадан кейін Виктория полицияға арыз жазып, Қорғаныс министрлігімен байланысқан. Оның сөзінше, министрліктен кейінге қалдыру құқығының әлі де күшінде екені және оның інісін әскери комиссариатта ұстап отыруға ешкімнің құқығы жоқ екені айтылған. Осыдан кейін 5 студенттің барлығы босатылған. Қыз олардың әскери комиссариатта бір тәуліктен артық болғанын айтты.

«Осы факті бойынша азаматтарды мерзімді әскери қызметке шақыру кезінде заң талаптарының сақталуын қоса алғанда, барлық мән-жайларды зерделеу мақсатында тексеру ұйымдастырылды», деп хабарлады Қарағанды облысының шақыру комиссиясы.

Комиссия өкілдері тексеру барысында заң бұзушылықтар немесе қызметтік өкілеттіктерді асыра пайдалану фактілері анықталса, кінәлілер жауапкершілікке тартылатынын мәлімдеді.

Әскердегі жаңа талап: Енді сарбаз қызмет барысында кемінде 5 кітап оқуға міндетті