Атырауға ұшсаңыз жүгіңізге сақ болыңыз : америкалық Pegasus‑қа шағымданды

Қазақстанда тұратын АҚШ азаматы Мэтью Уитфорд Атырауға сапары кезінде чемоданы жоғалғаннан кейін Pegasus әуе компаниясына ашық шағымданды.

Мэтью Уитфордтің айтуынша, әуе компаниясы бастапқыда  PIR құжаты жоқ деп, өтемақы төлеуден бас тартқан. Кейін Pegasus 429 АҚШ долларын төлеуге келісім бергенімен, оның сөзінше, ақша әлі түспеген.

Өз хикаясын Уитфорд Threads желісінде жариялады. Ол Қазақстанда екі жылдан бері тұратынын, ал жүгінің 5 қаңтарда Ұлыбританиядан қайтып келген сапарда жоғалғанын жазды.

Америкалықтың айтуынша, Атырауға келгеннен кейін ол Pegasus өкіліне жүгінген. Жоғалған багажды 21 күн бойы іздегенімен, нәтиже шықпаған. Осыдан соң ол өтемақыға өтініш берген.

Алайда Уитфордтың сөзінше, әуе компаниясы өтемақы төлеуден бас тартып, себебін PIR құжатының жоқтығымен түсіндірген. Бұл — багаж жоғалған жағдайда әуежайда толтырылатын акт. 

«Мәселе мынада: Атыраудағы Pegasus өкілі мұндай құжаттар жоқ екенін айтты. Жүкке қатысты барлық рәсімдер қолмен жасалады», — деп жазды ол.

Кейінірек, ер адамның айтуынша, әуе компаниясы оған 429 доллар көлемінде өтемақы төлеуді ұсынған. Ол келісіп, Kaspi‑шотының деректерін жіберген, бірақ төлем жасалмаған.

«Бұл ақпан айында болды. Қазір мамыр. Мен ешқандай өтемақы алған жоқпын», — деп жазды Уитфорд.

Оның сөзінше, бірнеше ай бойы ол компанияға қайта‑қайта хат жазып, чат операторларымен байланысқан. Бірақ жауаптар үнемі өзгеріп отырған: бірде «құжат жоқ» десе, бірде «тағы екі апта күтіңіз» деген, кейде «ақпарат дұрыс емес» деп мәлімдеген.

Қазір, Уитфордтың айтуынша, ол Түркияның авиациялық органдарына ресми шағым түсірген.

Сонымен бірге ол Атырау әуежайының қызметкері Гүлзинепке жеке алғыс білдірді. Оның сөзінше, Гүлзинеп бірнеше ай бойы оған көмектескен.

«Ол өте кәсіби әрі жауапты қызметкер. Атыраудан кеткеннен кейін де маған көмектесіп отырды», — деп жазды Уитфорд.

Бұл оқиғадағы басты сұрақ — шынымен де жолаушы PIR құжатынсыз қалған ба? Себебі дәл осы актінің жоқтығын Pegasus өтемақыдан бас тартуға негіз ретінде көрсеткен.

Редакция Pegasus Airlines пен Атырау халықаралық әуежайына ресми сауал жолдап, багаж жоғалған жағдайда рәсімдер қалай жүргізілетінін түсіндіруді сұрады.

Анастасия ШЕРСТЯНКИНА

Бүгін, 13:33