​Автобус апаты жиіледі: Прокуратура тексеріс қорытындысын жариялады

Жыл басынан бері елде автобустардың қатысуымен болатын жол апаты 6%-ға жуық көбейген. Бас көлік прокуратурасы жүргізген тексеріс жолаушылар тасымалы саласында жаппай заңбұзушылықтардың орын алып жатқанын анықтады.

Ресми мәліметке сәйкес, жыл басынан бері автобус жүргізушілерінің қатысуымен 644 жол-көлік оқиғасы тіркелген (былтыр 606 оқиға болған). Бұл апаттардан 24 адам қаза тауып, 955 адам түрлі жарақат алды.

Прокуратура органдары жүргізген талдау нәтижесінде 448 тасымалдаушы компанияның жұмысынан өрескел кемшіліктер табылды. Атап айтқанда, лицензия алу немесе жұмыс істеу кезінде қойылатын міндетті қауіпсіздік талаптары көбіне қағаз жүзінде өтірік толтырылып келген.

Тексеру барысында анықталған негізгі заңбұзушылықтар:

Жөндеу базасы ретінде автобусқа қызмет көрсетуге мүлде бейімделмеген ғимараттар көрсетілген; Бір техникалық маман немесе медицина қызметкері бір мезгілде бірнеше фирманың штатында тіркеліп отырған; Тахографтардың болуы мен жұмыс істеуі қадағаланбаған; Мемлекеттік органдарға мерзімі өтіп кеткен сақтандыру полистері ұсынылған.

Бас көлік прокуратурасының хабарлауынша, бұл жағдай лицензия беру кезінде де, одан кейінгі мемлекеттік бақылау барысында да жүйелі кемшіліктер бар екенін көрсетеді. Уәкілетті органдар біліктілік талаптарына сай келмейтін компанияларды уақытында анықтап, оларды тасымалдан шеттетпеген.

Прокурорлық қадағалау актісінің нәтижесінде 124 тасымалдаушы әкімшілік жауапкершілікке тартылып, 36 компанияның лицензиясы тоқтатылды. Осы салаға жауапты бірқатар лауазымды тұлғалар да әкімшілік және тәртіптік жаза алды.

Қазіргі уақытта қалған тасымалдаушылар бойынша тексеріс жұмыстары жалғасуда. Бас көлік прокуратурасы анықталған заңбұзушылықтарды толық жою мәселесін өз бақылауында ұстап отыр.

Бүгін, 15:17