Автокөлік өндірісі рекордтық деңгейге жетті

2025 жылы Қазақстан автомобиль өнеркәсібі сала тарихындағы ең жоғары көрсеткішке қол жеткізді.
«Қазақстан автомобиль одағының» мәліметінше, елде 171 144 автокөлік құралы шығарылып, бұл 2024 жылмен салыстырғанда 17,8%-ға артқан. Жалпы өндіріс көлемі 2,3 трлн теңгеден асты.

Автокөлік саласы машина жасау өнеркәсібінің 41,7%-ын және өңдеу өнеркәсібінің шамамен 8%-ын құрап, индустриялық өсімнің негізгі драйвері болып отыр.

Салаға 2025 жылы 113,6 млрд теңге инвестиция тартылған. Бұл қаражат өндірісті жаңғыртуға, жаңа зауыттар ашуға және автокомпоненттер номенклатурасын кеңейтуге бағытталған. Алматы мен Қостанайда Astana Motors Manufacturing Kazakhstan және Kia Qazaqstan зауыттары іске қосылды.

Өндірістің өсуі жұмыспен қамтуға да оң әсер етті. Саладағы қызметкерлер саны 11 153 адамға жетіп, бір жылда 62,2%-ға артқан.

Негізгі үлесті жеңіл автомобильдер құрады – 158 944 бірлік (+19%). Коммерциялық техника өндірісі 12 200 бірлікке жетті (+8%).

Өңірлер бойынша ең жоғары көрсеткіш Қостанай мен Алматы облыстарына тиесілі. Allur зауыты 92 100 көлік, Hyundai Trans Kazakhstan 52 040 көлік шығарды. Жаңа Astana Motors зауыты алғашқы айларында 15 180 көлік, ал Kia Qazaqstan 2 885 көлік өндірген.

Өнеркәсіп және құрылыс министрлігінің мәліметінше, бұл өсім өндірісті жергіліктендіру, инвестиция тарту және экспорттық әлеуетті арттыруға бағытталған мемлекеттік саясаттың нәтижесі.