Аяқ қолын сындыр : боксшы Еркебұлан Шынәлиев өзін Айнұр Тұрсынбаеваның күйеуі қорқытқанын айтады

Бокстан Бейжің Олимпиадасының қола жүлдегері, әлем чемпионатының күміс және қола жүлдегері Еркебұлан Шынәлиев өзіне қарсы жасалған қастандық жайлы айтып, құқық қорғау органдарынан көмек сұрады, – деп хабарлайды Aikyn.kz сайты. 

Боксшының айтуынша, 2025 жылдың мамыр айында оны Иманәлиев Нұржан мен Мұқашев Шыңғыс есімді азаматтар Ыстамбұл қаласына бапкерлік қызметке шақырған. Ол аталған азаматтардың үйінде шамамен он күн тұрып, жаттығу жұмыстарын жүргізген.

– Елге оралған соң, Шыңғыс Мұқашев маған бірнеше рет хабарласып, «бір-екі адамды сындыру» туралы ұсыныс айтты. Яғни, аяқ-қолын әдейі сындырып беруімді сұрады, белгілі бір көлемде ақша ұсынды, – дейді Еркебұлан Шынәлиев.

Боксшы бұл ұсыныстан үзілді-кесілді бас тартқанын, заңсыз әрекеттермен айналыспайтынын айтқан. Бірақ мұндай хабарламалар 3-4 рет қайталанған.

2026 жылдың қаңтар айында Еркебұлан Шынәлиевті қайтадан Ыстамбұлға шақырған. Бұл жолы «жаттықтырушылық мәселелерді ақылдасу» себеп болған.

– Барған соң мені Ыстамбұлдан 150-200 шақырым жердегі ну орманда орналасқан ғимаратқа апарды. Сол жерде маған бірқатар қағаз көрсетіп, «ҰҚК адамымын деп мойындайсың» деп, жалған мәліметтерді зорлықпен айтқызды. Басымa тапанша тақап, қорқытты. Сол сәттегі қорқыныштан не айтып, не қойғанымды білмей қалдым. Барлығын видеоға түсіріп, мәлімдеме жасатты. Қасымда сақалды, Қырғызстан азаматтары болған адамдар жүрді. Кейбірі қылмыс жасап, сол жаққа қашып кеткенін байқадым, – дейді спортшы.

Боксшы кейін Қазақстанға аман-есен оралғанын айтады. Оның болжамынша, Нұржан Иманәлиев пен Шыңғыс Мұқашев бұл әрекеттерді Түркиядан саяси баспана алу мақсатында ұйымдастыруы мүмкін.

Еркебұлан Шынәлиев Бас прокуратура мен Ішкі істер министрлігінен бұл іске заң аясында баға беріп, тиісті шара қабылдауды сұрады.

Нұржан Иманәлиев әлеуметтік желіде боксшының мәлімдемесіне жауап ретінде жазба қалдырған. Онда:

– Дәл қазір сен көмектескен адам өзгелерге сені жаман адам деп айтып жүр, – деп жазған.

Ішкі істер министрлігінің мәліметінше, Нұржан Иманәлиев «Нойс» лақап атымен белгілі. Ол қылмыстық ортада «Дикий Арман» атымен танылған Арман Жұмагелдиевтің жақын серігі әрі оң қолы болған.